古天樂監製及主演嘅科幻電影《明日戰記》票房衝破6625萬，成為香港電影史上華語片票房第一位，古天樂謝票時講派「福利」，繼吳肇軒演B16區難民生活片段流出後，呢次輪到飾演譚冰上校嘅劉嘉玲及飾演蒼松博士嘅謝君豪喺軍機上刪剪片段曝光！

「難民」吳肇軒憶述B16區貧民生活。

謝君豪飾演蒼松博士指責人類荒謬，急速發展整病咗地球之後，要住「金魚缸」解決問題。

片段見謝君豪遙望窗外，睇見B16區正建造人造溫室「天幕」，佢指責人類荒謬，急速發展整病咗地球之後，只可以做啲「金魚缸」去解決問題，甚至慨嘆「潘朵拉」有效過濾空氣中有毒物質，或許係上天畀地球一次機會，但劉嘉玲則冷淡地講要確保計劃任何情況下都有後備方案，當謝君豪追問後備方案係幾時，劉嘉玲則沉默不語。

劉嘉玲飾演譚冰上校，冷淡地講要確保計劃任何情況下都有後備方案。

故事發展到2050年，全球各地區派出代表商討應對政策，其中環境保護學權威「李綺雯博士」，提出興建天幕保護層，長時間保護市民，各地領袖相討後達成共識，支持興建天幕決定。

古仔一向笑指自己幫阿媽打工，又透露公司《天下一電影》每部產品嘅出品人都係寫阿媽李綺雯個名，今次《明日戰記》並未登場嘅「李綺雯博士」，正係古仔媽咪名字，相信呢個角色喺《明日戰記》前傳動畫電影，地位舉足輕重，故事圍繞B16區代表人物就係李昇（張家輝 飾），佢一直堅持「天幕計劃」。《明日戰記》動畫版好有機會由「李綺雯」呢個關鍵角色開始。

故事發展到2050年，環境保護學權威「李綺雯博士」提出興建天幕保護層。

另一條流出嘅影片主要講「天幕具體方案」，話說科技喺飛速發展，地球卻日漸消亡，人類喺大自然面前潰不成軍，空氣佈滿肉眼可見嘅懸浮物，饑荒、旱災、瘟疫、海洋水位上升、多種物種滅絕，世界人口喺短時間內急速遞減50%，面對如此惡劣生存環境，僅餘人類只係依靠有限資源分配，苟延殘喘地過活。

天幕啟動速度遠遠趕唔上人類死亡嘅腳步，B16區冇拎到入場券嘅四百多萬人，活在苦苦掙扎之中。

天幕直徑約20公里，柱高約1000米，每個天幕大約可容納150萬人口。天幕除咗淨化空氣，仲可以儲存且淨化雨水，呢個看似有啲鴕鳥政策嘅計劃確實解決當下嚴峻形勢，令人類喺天幕內可以過著正常生活。廿多年過去，2055年全球範圍已落成過百個天幕，惠及過億人口，但呢個龐大嘅金魚缸並非人們想像咁完美無缺。

由於工程難度極高，費時費力且耗資巨大，擁有560萬人口嘅B16區執行需時較長，只建成咗一個完整天幕，仲有一個正在建造中，天幕啟動速度遠遠趕唔上人類死亡嘅腳步。B16區冇拎到入場券嘅四百多萬人，活在苦苦掙扎之中。

古天樂旗下嘅子公司力捧9人男團XODIAC，隊長LEX、韓國成員WAIN及香港隊友Sing呢日現身銅鑼灣出席一個品牌活動，呢個係佢哋出道以嚟第一個海外活動，吸引大批fans到場支持，三子心情無比興奮。

XODIAC三子今次行程忙碌，香港地膽Sing未能抽時間帶LEX同WAIN遊玩，LEX同WAIN之前拍MV曾經嚟過香港一次，而WAIN難忘香港街頭小吃，最喜歡食大腸串；被問最想同邊位香港藝人合作，LEX賣口乖想與老闆古天樂合作，WAIN爆自己暫時未見過老闆古天樂，不過佢聽成員講老闆出現氣勢已經震懾人心，WAIN好想有機會跟老闆見面食餐飯。