霍啟剛家書勉長子力爭上遊 家族關注體育成就首次奧運

由顧紀筠主持嘅特備節目《看見家書》今晚播出第二集，去年底獲選為立法會議員嘅霍啟剛，同時身為全國政協委員、香港體育協會暨奧林匹克委員會副會長同霍英東集團副總裁，公務雖然繁重，不過佢同太太郭晶晶兵依然冇忽視同子女嘅溝通，認同親子關係非常重要。

佢借《香港家書》寫信俾10年後嘅9歲長子中曦，分享家族推動體育運動嘅理念。 信中霍啟剛講出身為人父嘅兩難︰「今年係香港回歸25周年，爸爸嘅事業上踏上咗新征程，年初上任立法會議員後，雖然少咗時間陪你，但好感恩你都明白爸爸所做嘅一切，係希望你哋下一代有個更好嘅環境。」

佢提到自己小時候從未諗過，會參加唔同社會公職，覺得拜爺爺同父親的耳濡目染所致， 霍啟剛話︰「成日聽到你太爺(霍英東)同爺爺(霍震霆)講起體育，希望為祖國出力，用體育運動令世界認識中國。記得太爺喺70年代左右，已經好努力咁為國家奔走，希望令新中國喺國際體壇恢復合法席位。」

事實上佢哋一直為中國能夠舉辦奧運會，喺國際間進行游說，終於喺2001年成功爭取到奧運主辦權，霍震霆更成為香港首名國際奧委會委員。 信中又提到中曦3歲時嘅往事︰「唔知你仲記唔記得，你3歲嗰陣，我哋一齊去參加3公里嘅慈善馬拉松比賽，我一直好擔心你應付唔到，估唔到你一直無停落來，努力向前， 直達終點。見到你有呢一份好似媽媽咁嘅運動員精神，我真係好開心。希望喺未來，你見到我哋幾代都為國家、為香港嘅體育發展貢獻，你都會將呢分心意傳承落去。」