《美麗戰場》分隊《獎門人》撕殺 Jumibo啜功高強阿Bob唔使郁

今晚播出嘅《開心無敵長門人》將會由台慶劇《美麗戰場》嘅一班演員，分別組成 「美麗隊」同「戰場隊」激烈競爭，由劇內鬥到劇外，「美麗隊」嘅陳山聰、陳瀅、陳曉華、何依婷、林景程、魯振順、蔡康年、關嘉敏、葉蒨文、 葉泓聲（Gordon），同「戰場隊」嘅林盛斌（Bob）、蔣家旻、劉佩玥、朱晨麗、丁子朗、黎芷珊、曾淑雅（Jumbo）、王菲、戴耀明、李紹堅分別激鬥，《美麗戰場》嘅監製葉念琛亦有現身撐場。

首個遊戲「開心無敵啜乒乓」已讓觀眾大飽眼福，兩隊「女神」陳瀅、Jumbo、葉蒨文、朱 晨麗、何依婷同關嘉敏傾巢而出落力「啜」，有人索樣依舊，同樣有人儀態盡失；其中遭 Bob脅持啜波搶分嘅Jumbo，百發百中嘅表現亦成為大家取笑嘅話題。

之後嘅「開心無敵呼拉圈」，由有兩歲囝囝Jaco嘅山聰夥拍何依婷，同「四孩之父」Bob加Jumbo比拼；抱B練出好腰力好臂力嘅山聰以「光速」狂揈依婷，任由擺布嘅依婷就嚇到全程奪命狂呼；另一邊廂身高1.74米嘅Jumbo一開始就慘遭阿Bob拋落地，出盡奶力狂揈依然零進展嘅Bob攰到乸埋口面大叫：「你要郁架！」

結果Jumbo生擒人夫Bob瘋狂圍圈爬，令有氣唞嘅Bob笑言：「呢個遊戲都幾好玩喎！」引來全場笑到碌地， 及後朱晨麗接力同Bob上演「示範賽」，不過就表現得勁遴迍（論盡），仲幾乎齊齊仆落地。

過往多年享譽全娛樂圈嘅辣辣壽司，呢集就變為辣辣壽包，當中仲有指天椒、麻辣同Wasabi 等唔同口味。而阿Bob早前一集連吞3件辣壽司搞到噴鼻血後，呢集再慘遭隊友蔣家旻、Jumbo 等「陷害」，被「質」到成口都係食剩嘅辣辣壽包，仲辣到標冷汗，場面搞笑。

之後兩位人夫Bob同山聰玩「開心無敵拍拍拍」時，瘋狂喪爆「有味」 答案互相傷害，搞到連獎門人都睇不過眼叫停比賽：「你呢兩條友吖，我都唔知出唔出到街！」 至於「開心無敵口噏噏」當中，丁子朗就施展渾身解數比出17隻字，肉緊嘅Bob估到噴口水又谷到紅都面晒，最後仲大嗌愛邵逸夫爵士，想知Bob點解無端端「擦鞋」，就要留意今晚播出嘅《開心無敵獎門人》喇。