過千參賽者《中年好聲音》面試 各有感人故事實力不容少覷

日前進行首輪面試嘅《中年好聲音》，星期六再次舉行面試，仲吸引咗過千位超過35歲嘅音樂愛好者參加，除咗噚日同大家睇過嘅部份參賽者背景雄厚，就連面試評判曾志偉、音樂人張佳添、伍仲衡同肥媽都被佢哋唔少人背後嘅故事感動呀。

亦因為背後故事豐富又感人，志偉就話原定12集嘅節目正考慮加長，同大家分享參加者嘅故事。而肥媽就指有患癌症嘅參加者雖然未能入圍，不過佢嘅正面就令自己大為感觸。過千人當中除咗人人都有各自參賽原因，亦都要有一定質素先能夠入圍，而伍仲衡就話自己唔單以歌喉作準則，仲希望入圍者要有個人風格呀。

面試當中仲有大家非常熟悉嘅面孔，喺《愛．回家之開心速遞》扮演「賈名媛」嘅邱芷微呢日就以參加者身份出現，不過平時對慣鏡頭演戲嘅佢，試音時就竟然緊張到失準喎。除咗賈名媛之外，仲有唔少多年前曾經參加過大型歌唱比賽，呢日亦都再次重燃當年夢想再次現身面試，更加有身障朋友到場，希望大家明白身殘志堅嘅道理呀。