Dear Jane戶外演唱會11月開鑼 Rock妝影海報似足哈佬喂

Dear Jane11月將會喺西九龍文化區舉辦首個名為《What’s Happening》嘅戶外音樂會，日前成員為演唱會拍攝宣傳海報，以平時少見嘅強勁搖滾式化妝，帶出音樂會有以往樂迷喜愛嘅 Dear Jane，同時亦有前所未見嘅Dear Jane同大家見面。

佢哋話今次音樂會將有非常搖滾嘅音樂部份，希望大家準備定激動心情欣賞呀。而為咗今次拍攝，佢哋就花近三個鐘頭化妝，四人事後就異口同聲話非常好玩喇：「真係未試過咁化，諗下諗下今次個妝應該都算係化得最Rock最爆嘅一次，哈哈。」

平時甚少畫眼線嘅Nice，就話今次唔多習慣同有啲辛苦，Jackal化完妝望鏡見到自己仲直情嚇咗一跳，而Tim仲即場剃咗半邊面鬍鬚，營造半暗黑效果呀。

佢哋又認為戶外演出氣氛會比室內場地好上百倍，一直希望可以辦戶外演唱會嘅Dear Jane，今次終於實現夢想，所以非常興奮呀，Jackal話 :  「我見有啲戶外show試過掉大型嘅波波落去觀眾度，「插水」式咁跳落觀眾度 ，假如可以的話，我真係好想試下，不過，雖然疫情進入左平台期，但都要謹守防疫規則，保持適當社交距離，哈哈....插水我估要等下次，疫情過左先可以試。掉波波呢，就會同演唱會監製同公司研究下，大家期待吓！」

而Tim就希望可以喺現場玩水喇 :  「我見過外國騷台上嘅表演者會用啲水槍對台下嘅觀眾「吱吱吱」，如果可以我想試吓用我枝咪變水槍咁樣「吱」大家！哈哈。」至於Howie嘅心願就仲跨張，話希望喺台上玩火呀 : 「 我見過有啲樂團開show個結他真係會噴火㗎！如果我枝結他噴火，真係正呀。」