湯寶如入行30年,相隔5年決定再舉行個唱,已灌錄多首新歌,佢原本今年3月想開騷,不過受疫情影響,改期至11月,佢笑稱今次喺西九龍戲曲中心可以穿著宮廷服,為咗今次個唱,湯寶如努力減磅瘦身,堅持每日做一小時瑜伽,有時出街跑步,二來佢解釋係因年紀大唔想太肥,又自爆天生膽固醇高,所以佢飲食比較清淡,平時烚魚、烚菜,好少食零食,平均一日食兩餐,湯寶如無奈稱早前食咗飯加上出席活動著咗嗰件衫又貼身,搞到佢被傳有咗。
湯寶如直言2012年喺紅館開騷,係入行以來最大嘅滿足感,因為每個歌手都希望踏足紅館呢個舞台,湯寶如喺香港樂壇黃金時段出道,明白嗰時入紙紅館係好難,當湯寶如後嚟完成紅館夢嗰刻係好開心,臨走仲聽到人哋讚演唱會好睇,湯寶如笑稱:「我覺得可以再闖紅館,修哥(胡楓)都可以,修哥好勁!隨時都得。」佢坦言入行以來冇遺憾事,唱歌、演戲、做主持、拍旅遊節目等均涉獵過,當中主持《流行經典50年》係好開心。
湯寶如自言當初歲數「入五」一度有啲抗拒,後嚟以平常心面對,更直認曾微整型。湯寶如稱抗拒整容,不過之前湯寶如睇相講眉心中間嘅直紋好明顯,成個「串」字,喺相學嚟講唔太好,當時佢睇醫生,建議佢打少少Botox,湯寶如表示:「打多唔好,少少就夠,因為打啲嘢入去,我驚驚哋,而家冇整。」
近年湯寶如經常陪家人,留喺屋企練歌,而家比較深閨跟以前不同,之前喜歡逛街;湯寶如5年前受訪指阿仔同佢啲歌曲冇咩興趣,湯寶如更分享與阿仔相處軼事:「前排佢問我,陳奕迅係唔係開騷,我答係,我心諗佢點解唔問我,不過佢都會嚟睇,佢有少少音樂細胞,佢聽歌都跟得幾貼,但係阿仔唔太想做娛樂圈,佢鍾意電腦程式。」湯寶如指阿仔鍾意同爸爸溝通多啲,佢笑言多年來愛情觀冇變,目前仍崇尚不婚主義,不介意各自找伴侶,跟伴侶相處十幾年,早已習慣家人模式,湯寶如指兒子現年16歲,佢並唔介意阿仔拍拖,只係灌輸一啲性知識,唔太希望咁早做阿嫲。
湯寶如想之後多啲同後輩合作,有留意《聲夢2》Janees黃洛妍唱《閉目入神》好好聽,睇《聲生不息》曾比特唱《初戀》,湯寶如稱翻睇好多次,又讚新人炎明熹有自信又犀利,湯寶如回想自己當年好懶惰,而家啲新人真係好努力。