向來鬼馬嘅林敏驄，早前喺社交平台釋出同鮑姐鮑起靜拍攝台慶劇《下流上車族》時，整蠱對方嘅片段，當日應該拍攝鮑姐住院戲份，當時郭柏妍、羅毓儀緊張咁問阿驄對方情況，點知阿驄突然爆肚話：「醫生話佢走咗、護士就話佢醒番，我都唔知信邊個好。」搞到本身好緊張嘅羅毓儀即刻忍唔住笑。

林敏驄話要幫鮑姐沖牛奶浴又叫「護士」幫佢換尿片整蠱成功

當整蠱完兩個郭柏妍同羅毓儀之後，阿驄轉攻着住病人衫、瞓喺病床上嘅鮑姐，佢先不停拍鮑姐，等對方以為自己要對戲，阿驄即拎起水壺話要幫佢沖牛奶浴，之後又叫扮演護士嘅演員埋嚟，叫對方幫鮑姐換尿片，搞到鮑姐笑到停唔到。

鮑姐飾演「投訴王」閔謝毓霞連親生仔家寶（林景程飾）都頂佢唔順，拋低佢移民去日本。

唔少網民睇完阿驄啲花絮片，都話好想可以快啲睇《下流上車族》，而套劇將會喺10月17日正式播出。劇入面鮑姐一改慈母形象，飾演一個性格古怪嘅獨居「投訴王」閔謝毓霞，就連佢親生仔家寶（林景程飾）都頂佢唔順拋低佢移民去日本，日前官方釋出以鮑姐為主角嘅預告片，當中林景程向鮑姐怒吼：「你個人固執、自私、野蠻，我係你個仔都唔想同你住呀！」然後強忍淚水嘅鮑姐，再配上佢嘅內心獨白：「阿仔走咗，我兩個老公走晒，所有嘅 人都整定會離開我嘅。」唔少網民都戥佢心噏。

台慶劇《下流上車族》 10月17日起 星期一至五 20:30 翡翠台

劉佩玥、張振朗、郭柏妍、陳山聰、丁子朗、林子善及監製文偉鴻拍攝劇集「奪命提示」期間為劉穎鏇慶生，場面歡樂。