野佬下月舉行十周年個唱 預告或有機會係最後一騷

今年係樂隊YELLOW!野佬成軍十周年，為咗紀念呢十年嚟嘅堅持，下個月將會喺西九舉行首個戶外騷《Harbour The Sonic - YELLOW! 10th ANNIVERSARY our finale is …》！

對於呢個十周年演唱會，野佬話會係佢哋嘅一個總結，亦有機會係野佬最後一個騷！鼓手阿銘話其實野佬成軍第8、9 年，佢哋喺成員上已經有人事變動，當中更有人移民離開香港，阿銘話：「當你有隊友申請移民時，無可否認代表着大家一齊嘅日子越來越少，亦都唔知幾時完，所以選擇抱住最後一次嘅心情去搞。」

雖然未來係點大家都唔知，所以野佬決定專注眼前嘅騷先！對於舉辦成軍後首個戶外騷，野佬幾位成員都表示雀躍，因為呢個場地將會係佢哋演出過嘅場地中，最大型嘅一個。問到幾位屆時會唔會騷肌示人？結他手阿康就講笑話自己突然患上五十肩：「趕得切醫好都趕唔切操肌，大家有興趣睇瘦仔show骨嗎？」而Wilson就指因為喺上一個演唱會時佢哋已經有曬過肌肉洗濕咗個頭，所以今次十周年個唱都會操弗騷肌，希望喺觀眾嘅回憶中，留低野佬長青嘅一面。

另外，除咗宣佈十周年個唱外，野佬亦透露將推出新歌〈抗氧化組合〉，仲話為咗呢首新歌嘅MV碌盡人情咭，搵嚟：泥鯭@RubberBand、張明偉、插畫師Afa LEE 李思汝等好友客串呀！