[獨家] 唐詩詠客串霸氣大婆 只因葉念琛貪佢夠惡

無綫55周年台慶劇《美麗戰場》播出引起熱話，呢晚播出嘅一集，焦點落喺客串演出嘅唐詩詠身上，飾演富貴趙太嘅唐詩詠，同趙生（麥秋成飾）表面一家和睦，隨住陳瀅飾演嘅鍾家寶撞破趙生偷食後，某日趙太忽然通知家寶已遭解僱，仲話佢見到啲唔應該見到嘅嘢！正當觀眾與家寶以為係趙生「滅口」，劇情卻大反轉，原來係家寶當日影趙生偷食照片並勒索30萬，趙生決定向趙太自首，趙太寸完老公一輪後，即着手處理「蘇州屎」。

唐詩詠同陳瀅呢幕「講數戲」，由趙太先向家寶表明立場：「你估我第一次知道我老公拖住第二個女人？咁多年佢出面有幾多女人，我會唔知道咩？」並指解僱佢係因為知道趙生對家寶有意思，更霸氣指摘家寶表面純情，裏面充滿機心，叫家寶唔使擺出無辜樣，若果咁清高就唔會勒索，不過網民覺得唐詩詠有宣萱演《不懂撒嬌的女人》Mall姐嘅感覺！

唐詩詠早前接受訪問時，直指葉念琛搵佢演趙太全因覺得佢夠惡：「葉念琛成日話我好惡，應該畀人見到我呢一面喎。呢個角色我從來冇做過，一個心思好細密、好聰明嘅一個女人，覺得原來女人真係咩都做得出，尤其係踩到入佢家庭，所以唔好恰女人。」

唐詩詠曾與陳瀅喺《四個女仔三個BAR》合作，大讚陳瀅有很大進步。唐詩詠呢次特別客串全因好友葉念琛，一日內完成所有拍攝，二人相識接近十五年，當年因電影《我的最愛》結緣，合作過《我要發達》、《我的情敵女婿》及《阿索的故事》，唐詩詠喺《阿索》嘅角色亦叫阿寶。 

另外，陳曉華飾演盲目痛愛渣男嘅小美，亦令網民睇到拳頭硬，仲話小美係大家喺劇中第二個最想摑醒嘅角色，不站摑還摑，小美個空姐配黑絲Look依然獲得網民大讚。

台慶劇《美麗戰場》逢周一至五晚九點半翡翠台播出