台慶劇《下流上車族》下星期一首播，呢日演員林敏驄、江美儀及鮑起靜率領後輩現身宣傳，故事圍繞講港人上車，有笑有淚，林敏驄同《聲夢傳奇》文凱婷（Aeren）合唱主題曲《一家人》，江美儀聽完覺得好感動，仲話畀朋友聽呢首歌「一家人」好洗腦。

鮑起靜爆料指林敏驄開工時經常唔跟劇本改對白：「有時我哋唔知佢做咩，導演話總之你企喺度唔好郁，我會剪走。」身邊江美儀即大笑兼不斷點頭，江美儀話阿驄不時爆肚更臨時加插感人戲份，令江美儀停機後喊足10分鐘，完全被溫情攻破，佢叫大家上網睇《一家人》MV留意彩蛋，原來MV裡面加入私伙shot，而同劇丁子朗、黃建東及林景程則圍繞鮑姐做對手戲，榮幸可以同影后級前輩合作，覺得畢生無憾。

由《聲夢傳奇》畢業生 何晉樂 林智樂 文凱婷 林沚羿 同《聲夢傳奇2》亞軍 黃洛妍 擔任主持嘅全新音樂節目《MUSIC BREAK》，上周起正式播出。幾位主持除咗為觀眾推介心水歌單外，亦會輪流喺個人IG開Live陪大家睇電視同傾吓偈。大家只要喺節目播出期間掃瞄螢幕上嘅QR Code，就可以同主持實時互動喇。

《MUSIC BREAK》嘅幾位主持，每晚都會為大家帶嚟唔同好歌

打頭陣直播嘅Rock就為大家推介陳奕迅嘅歌曲，直播期間Rock仲俾Fans即席點歌，Rock拎出結他自彈自唱《阿牛》時，有觀眾就搞笑留言：「你間房啲隔音得唔得架，咁夜彈結他會唔會被鄰居投訴，投訴指要入埋你間房現場聽。」

而星期二晚接棒嘅Felix，就同大家走入容祖兒之夜，Felix化身Fans開箱容祖兒演唱會大碟。 至於Aeren就向觀眾推介鄭秀文嘅好歌，獻唱《Chotto 等等》後仲有感而發，佢話：「我聽呢首歌時已經好大個，所以聽嗰時未必係心花怒放，而係有少少對愛情不安全感喺入面，好想同對方講，希望你依家對我嘅好唔係衝動，因為我想同你嘅關係係好長遠，所以要慢慢嚟。」

至於星期四晚嘅主持Janees就為大家送上歌神張學友嘅金曲，獻唱《餓狼傳說》時仲動作表情多多，非常入迷，Janees話：「我對呢首歌好有印象，因為我好鍾意扮動物聲，首歌入面嘅狼叫令到我好開心。」之後更隨即扮狼叫大晒真性情，最後又為大家獻唱「臨瞓版」《愛是永恒》。

擔任星期五主持嘅Venus就推介劉德華嘅歌曲，佢透露身為著名武術指導嘅爸爸林迪安同劉德華非常有緣，皆因佢哋同年同月同日出世。直播期間迪安哥个一度亂入，隔門獻唱劉德華嘅《暗裡著迷》，雖然未見其人只聞其聲，但仍獲唔少網友大讚唱功，仲力推佢參加周末就進行海選嘅《中年好聲音》呀。

Venus直播時Daddy迪安哥喺門外大騷歌喉，唔知有冇興建參加《中年好聲音2》呢？

《MUSIC BREAK》星期一至五深夜 01:35 翡翠台 / 星期一至五 09:30 J2 重播