一代香港歌手代表羅文離世20周年,呢日嘅紀念演唱會邀請咗一班同佢有緊密關係嘅歌手徒弟,仲有樂壇新世代成員獻唱,除咗有汪明荃夫婦、鄭欣宜、草蜢等之外,身為愛徒嘅容祖兒亦都壓軸登場,Joey回想當年同師傅嘅點滴回憶,喺台上仲非常感觸呀。
事後Joey亦回憶當年獲得嘅提携,加上已經久未踏上紅館舞台,所以唔少感受一擁而上喇。而陳潔靈就特別以《家變》表演,仲話當中嘅歌詞到今日依然非常有啟發性,更加話依然非常思念呢位老友呀。
至於新一代歌手當中獲邀表演嘅組合XiX,就獲Miss Chan Chan大讚夠晒勤力,表現亦都非常唔錯呀。至於首次踏上紅館嘅XiX成員,就以全白打扮出現,佢哋就話既緊張又興奮,仲多謝前輩嘅指教呀。
同羅文多年好友嘅Liza姐,就因為粵劇演出改期而現身紀念故友,而家英哥就同米雪打靚靚合唱喇。