大型籌款節目《星光熠熠耀保良》呢日舉行記者會，After Class、露雲娜、譚嘉儀、陳逸璇、蔡頌思、應屆港姐林鈺洧、許子萱等都有現身。

After Class四小花表示當晚將會分開演出，Windy詹天文就會同露雲娜合唱、Chantel 姚焯菲同Miss Chan Chan合唱，而Yumi鍾柔美就會拍住阿姐汪明荃，至於Gigi炎明熹就話會同自己合唱。對於第二次再同阿姐合唱，Yumi話今次心情冇上一次咁緊張，仲話可以同阿姐傾下偈，覺得大家嘅距離反而拉近咗。講到就嚟萬聖節，四小花都話想去主題公園玩鬼屋，問到佢哋當中邊個最細膽？大家都不約而同話係Chantel BB，之後Windy同Yumi仲扮Gigi早前去主題公園，好冷靜咁玩機動遊戲個樣。

12月將會舉行個人騷嘅譚嘉儀，就話雖然未知到時嘅舞台造型會係點，但都開始積極瘦身，仲話自己唔介意健康性感嘅。而中招後康復嘅陳逸璇，被問到中招後可有影響佢唱歌？佢坦言啱啱好返嗰陣，行山做運動都會有啲氣喘，但就冇影響唱歌嘅。而喺今次籌款騷飾，蔡頌思就話會挑戰自己表示雙人舞。至於早前忙於領獎嘅林鈺洧同許子萱，就話因為獎品太多而引起煩惱，許子萱仲話因為咁而計劃租個大啲嘅單位，而林鈺洧就話要學習實行斷捨離。

慈善籌款節目《萬眾同心公益金》6月3號晚圓滿結束，多位嘉賓為慈善落力表演，好似 炎明熹 《中年好聲音》嘅 周吉佩 李佳 龍婷 羅啟豪 顏志恒 吳大強 等，加埋 陳美齡 譚嘉儀 曾比特 朱主愛 余宗遙 鍾柔美 ，而近年甚少公開演出嘅 張德蘭 呢日亦罕有登台為慈善出力，仲話非常留意《聲夢》同《好聲音》參賽者嘅演出呀。

呢日唔少參與歌手都把握機會同佢合照，當中梗係唔少得Gigi啦，而Gigi仲大爆平時極少同藝人合照嘅姑丈，呢日都公開要求集郵，Gigi仲笑返怕醜姑丈轉頭呀。

Yumi好快就會踏入中學最後一年，近日正埋首溫習考試嘅佢，就話已經開始對來年嘅DSE感到緊張，仲話會好好安排時間準備，不過大家亦唔使擔心，因為佢同Gigi都好快會有新歌推出喇。

早前往美國登台開騷嘅 許志安 呢日都係表演嘉賓之一，佢亦現場獻唱新歌，受訪時亦提到重訪一廠見到現場觀眾令自己憶起當年，又指即將會喺新加坡開騷，亦正籌備香港嘅表演，不過估計就要出年先可以成事喇。

《中年好聲音》嘅幾位成員呢晚由過去嘅觀眾變成表演者，佢哋都覺得非常開心，仲話感覺非常有趣呀。羅啟豪呢晚就再同媽咪同台演出，不過羅媽媽就話非常緊張喇。龍婷同李佳呢晚亦大展歌喉，不過去到後台就變成小Fans同各位前輩見面合照喇。

新時代歌手阿Mike亦都同朱主愛仲有余宗遙合作，仲爆不時狂Loop朱主愛嘅網絡神曲咁話呀。