林敏驄馬拉松棋逢敵手 馮盈盈無私提供meme圖

竟然有人可以喺「開心無敵馬拉松」上贏到林敏驄？啱啱（16日）播出嘅《開心無敵獎門人》入面，林敏驄再發揮九唔搭八本色，將一堆唔關事嘅用語駁堆一齊，個個答案都成20-50個字，當大家都以為冇人會背得返出嚟嗰陣，FYY就完美咁背返晒出嚟！

今集《開心無敵獎門人》由「下流上車族隊」VS「後生仔傾吓偈隊」，出名百厭嘅阿驄全程喺度搞搞震，仲累到大家要食辣包。而FYY就搏到盡完全唔顧儀態，喺啜乒乓波嗰陣仲擘到個口勁大，相信為網民提供咗唔少meme同Stickers材料。

事後FYY接受訪問嗰陣，就話多謝美儀姐承讓，佢仲即興再背一次「馬拉松」個答案出嚟，睇到隔離嘅陸浩明O晒嘴，仲講笑咁奉獻廣大觀眾唔好得罪女人，因為睇FYY表現就知女人記性好好呀！

而敏訪問嗰陣，林敏驄就一反常態，好認真咁多謝一眾《下流上車族》嘅演員，仲話估唔到自己第一次拍劇就可以遇到一班咁好嘅拍檔。講到喺《獎門人》入面玩輸遊戲要食辣包，鄧智堅就話自己食指天椒包食到把聲都沙晒，而阿驄就話好多辣包都係佢頂咗，佢仲好囂張咁話自己食完囂覺得辣，只係覺得好飽咋！