Phil林奕匡同Cath黃妍成日會孖住一齊出席慈善活動，呢日佢哋就同埋梁釗峰同Cloud雲浩影現身禁煙活動，一齊推廣戒煙好處。黃妍話公司成日安排佢同Phil一齊出活動係有原因，因為佢哋都係出名嘅書呆子同學霸，所以傾嘅話題都比較悶，但Phil聽到即糾正Cath，話只係佢哋嘅話題比較有內涵同深度，所以先唔係個個人明白。

早前為《聲夢傳奇2》擔任導師嘅Phil，就話自己嚟緊嘅《聲夢》踢館賽佢都會以半導師半朋友嘅身份協助香港嘅學員。而早排同鄭伊健一齊開完live嘅釗峰同Cloud，問到佢哋有冇同伊健自薦做對方嘅紅館演唱會嘉賓？佢哋就話等對方決定，自己唔敢多口呀。

梁釗峰獲公司力撐推出4首新歌，呢日為第一首主打歌拍MV，雖然釗峰只係參與一小段拍攝，不過佢仍陪團隊捱通宵，釗峰又感激公司支持佢呢個企劃！

今次談善言夥拍梁仲恆主演MV，釗峰感謝兩位主角賣力演出，而釗峰飾演「遺憾整理師」作為故事脈絡，釗峰稱今次通宵跟足全程十個鐘拍攝，就係想向談善言同梁仲恆二人演技偷師，釗峰歌迷會更召集廿幾位「峰心粉」客串，為咗答謝歌迷，釗峰亦親手送上小禮物。