下流上車族丨首集收視告捷23.2點 林敏驄爆肚啜核 江美儀經典黑絲再現

TVB台慶劇《下流上車族》演員林敏驄、江美儀、鮑起靜、郭柏姸、羅毓儀、林穎彤、丁子朗及袁文傑等，《下流上車族》噚晚首播，由劇情輕鬆搞笑又貼地、笑中有淚，加上係林敏驄處男劇，觀眾都想睇佢嘅無厘頭演技；噚晚首播後，網民反應一致正面，《下流》首集跨平台直播收視高開23.2點，比上周一同時段播映嘅《夢華錄》躍升5個收視點，係翡翠台自今年4月政府放寬堂食以來，兩線劇首播最高收視劇集。
噚晚劇情講到雯慧（江美儀飾）偷偷地帶屋企人到佢做鐘點嘅豪宅歎世界，怎料豪宅主人突然歸家，身為超市經理嘅車志明（林敏驄飾）即「硬兜」係上門Sell貨，芊芊（郭柏姸飾）、蔓蔓（羅毓儀飾）扮晒嘢指幫媽咪打掃，最終車家成功蒙混過關，車家一家四口互動默契十足，既溫馨又搞笑。

網友對於首次拍劇嘅驄哥普遍受落，大讚佢對白啜核兼演技自然，「啲對白係咪即興freestyle咁」、「正正經經做戲都有啲料」、「啲戲又幾自然，睇得幾舒服」。郭柏姸及羅毓儀嘅高顏值亦引起網友關注，「家姐靚到癲」、「羅毓儀真係好童顏」、「羅毓儀終於等到機會，希望她有很好的發揮」。

「驄儀CP」同係好戲之人，喺劇中擦出不少火花，江美儀受訪時大讚驄哥係天才：「佢呢啲IQ咁高嘅人係好難捉摸，雖然佢成日爆肚，但佢唔係亂嚟嘅，同埋佢其實係喺度觀察緊你係咪一個認真做嘢嘅人。」
江美儀續指驄哥雖然有時扭計要人陪玩，但佢工作時非常認真，每次開工好準時。講到兩個「女兒」郭柏姸及羅毓儀，江美儀睇好郭柏姸羅毓儀彈出：「兩個都好聰明，進步得好快。」

昨晚一集兩大亮點，絕對係江美儀經典黑絲重現及車家三母女水着！曾被網民封為「黑絲儀」嘅江美儀，穿睡衣配黑絲大騷無敵長腿，Fit爆身材令人艷羨，江美儀黑絲重現江湖即時觸動網友神經，大讚江美儀Keep得好兼有女人味。
講到經典黑絲再現，江美儀笑謂：「我都唔知點解劇組咁鍾意要我着黑絲，我話：『吓，仲嚟？』佢哋話啲人好掛住我對黑絲！」問到平時如何保養美腿？江美儀大方分享：「我係唔會着短褲同埋短裙，因為我好驚畀蚊咬，所以就算30幾度去行山，我係會着長褲。」

車家三母女嬉水場口同樣吸睛，郭柏姸受訪時笑言：「一知道要拍呢場戲，即刻唔敢再食澱粉，肉都食少咗，以蔬菜為主。今集係一件頭泳衣，之後仲有一個場口係兩件頭，所以真係Keep得好緊要。」

台慶劇《下流上車族》逢周一至五晚八點半翡翠台播出