以香港人出盡法寶只為尋覓安樂蝸為題材嘅台慶劇《下流上車族》17號正式首播，呢日一班演員亦都約埋飯聚同時齊齊睇新劇播出，郭柏姸同羅毓儀一開場就以泳裝出現，而江美儀仲黑絲上陣誘惑老公林敏驄，不過佢哋就話呢啲統統都係小兒科嚟咋。

之後劇情仲有幾不得了，大家就要留意劇情先知喇，而首次拍劇嘅阿驄，仲被大家狂讚表現一流，仲不時爆肚現場加料，好在對手們個個做足準備嚟應付佢呀。喺超市搞屎棍嘅鮑姐，就話對自己同劇中拍檔嘅表現非常滿意喇，佢仲話大家嘅演出都100分呀。

要做一個古怪老人家乜都投訴，鄧智堅就話遲啲就會同鮑姐日夜鬥嘴，加埋關曜儁同林穎彤嘅寸嘴港女角色，Bella仲話特登唔抽離咁話喎。

Yuki 羅毓儀 除咗早前喺《下流上車族》演出深得唔少觀眾歡心之外，近日佢亦將會進軍樂壇，而日前踏入27歲生日嘅Yuki，仲同一班Fans一齊開生日會慶祝，但係同時正拍攝《愛．回家之開心速遞》同《非常檢控觀》嘅佢，就因為幾乎趕唔切到場，好在最後都可以到場同大家見面咋。

首次同Fans一齊過生日開Party嘅佢，仲話成廿年未曾開過生日會，難怪講起都咁興奮啦。Yuki仲話新一希望健康之餘，演技同音樂上表現都有更多進步，又話希望新歌可以盡快同大家見面，仲爆出好快會喺交通工具會見到佢咁話喎。