獨家直擊袁偉豪新歌MV拍攝 羅家英爆汪明荃幫口促成合作

袁偉豪熱愛夾band玩音樂，近年積極籌備音樂作品，呢日佢為自己包辦曲詞編監唱嘅新歌《馬路英雄》MV進行拍攝，為咗拍攝順利，佢更碌埋人情卡，搵兄弟林子善義務喺片場幫手打點。

袁偉豪今次搵羅家英做MV男主角，家英哥演特務角色深入民心，呢次以紳士氣質打扮演袁偉豪嘅上司，袁偉豪非常感謝家英哥肯應邀，而家英哥收到袁偉豪邀請時，原來唔係一口答應，仲自爆每次接工作前都要向上頭請示先敢接job，家英哥表示：「講完之後我就考慮吓先，後嚟我就問阿姐(汪明荃)，阿姐話後生仔正面、努力有上進心，公司都捧佢，『你幫得就幫啦』，佢(袁偉豪)又問我收幾錢，我就話你畀得幾多，我就收幾多。」

家英哥又指自己咩都要問阿姐，家英哥稱聽聞袁偉豪做導師教人做戲：「我都要向佢請教吓，我唔係導師，喺粵劇就得，喺電影電視，我都係新人嚟。」