下流上車族丨羅毓儀爆喊戲險「破功」 百厭林敏驄孖影后鬥戲旗鼓相當

下流上車族丨羅毓儀爆喊戲險「破功」 百厭林敏驄孖影后鬥戲旗鼓相當

TVB台慶劇《下流上車族》噚晚講鬼才林敏驄與金像獎影后鮑姐場「鬥戲」,旗鼓相當,講出車志明(林敏驄飾演)踩上「老小三」毓霞(鮑起靜飾演)屋企,想拎回亡父神主牌,之前已遭兒子「拋棄」嘅毓霞唔甘心「老公」又被搶,對住林敏驄怒吼:「我個仔要移民丟低我唔理,點知你仲衰,你連死人都要同我搶?!」志明踩上門搶番爸爸嘅神主牌,毓霞鬧爆志明搶佢「老公」。

林敏驄聞言即劃清界線,反擊稱佢哋母子嘅嘢唔好拉埋人落水,並叫毓霞反思自己點樣對待屋企人,又指著毓霞手上「定情信物」,佢接著講:「我老竇同埋呢隻戒指本來都係屬於我阿媽!」

志明爆Seed反擊,仲激動眼濕濕。
林敏驄越講越激動更一度哽咽:「我剩係知你擺我老竇(位置)低過隻狗,你好唔想見到佢,我咪依家攞走佢,唔使你眼冤,得唔得吖?」最終毓霞被志明激動又真摯嘅情緒「擊倒」而放棄「老公」,林敏驄默默地執拾好亡父神主牌,林敏驄臨出門口前,語重深長向以刁蠻馳名嘅毓霞講間屋企幾細唔係問題,最緊要一家人喺埋一齊。驄哥呢場戲演技大爆發,網友大讚佢嘅戲由內而外爆發出嚟,力撐佢可以爭視帝。
林敏驄發人深省嘅對白,配以劇集巧妙鏡頭及配樂,別具感染力。林敏驄出名轉數快又曳,如今曲風突變飾演滿載故事嘅「志明」竟然零違和,無論對白或舉手投足均充滿戲味及一啲都唔似平日嘅林敏驄,令網友給予一致好評,「明顯有好多對白係入晒戲,想喊嗰吓唔係扮出來」、「啲戲由內而外,唔造作好自然」、「呢場好好戲,有機會爭視帝」。驄哥執拾神主牌呢一幕,完全展現出毓霞與志明各有心事。
前晚嗰集鮑起靜道盡獨居老人苦況,講佢遭仔仔「拋棄」悽涼錄音Solo戲,同樣因感人度高引起熱話。劇情講述毓霞兒子家寶(林景程飾)傳短訊畀毓霞,表面關心毓霞,實則係想毓霞獨留香港。

鮑姐大晒影后級演技,2分鐘極速轉換3種情緒,首先係激動鬧仔然後又猶豫。

毓霞自覺被拋棄當下情緒複雜,先係激動地罵阿仔,鬧完一輪後又後悔地將訊息刪除,之後再分別以「期待」tone及「淒慘」tone錄音,最終毓霞選擇發送「淒慘」tone希望對仔仔動之以情,「阿媽淨係得番你一個,咁你係咪都唔想要我喇……」呢句更說得一臉哀傷兼自憐,打動無數網民,道出欠缺關愛嘅獨居老人苦況,網民留言「鮑姐呢段可以攞視后啦」、「好鬼滾動,睇到眼濕」。最後「淒慘」Tone問阿仔係咪唔要阿媽,神情滿是哀痛和自憐。
呢集另一焦點要數到羅毓儀飾演嘅「車蔓蔓」爆喊戲,講述喺外地讀書嘅蔓蔓,因違反候鳥保護法而被踢出校兼遭取消簽證,之後原本身在澳洲嘅家姐芊芊(郭柏妍飾)陪妹妹返港向媽媽雯慧(江美儀飾)贖罪,其間遭鬧爆嘅蔓蔓,爆喊講出孤身留在他鄉嘅苦況。蔓蔓畀人踢出校,家姐芊芊就陪佢返香港贖罪。
講到呢場爆喊戲,毓儀受訪時透露:「我都曾經去過外國讀書,一個人喺外地真係會好掛住屋企人,所以準備劇本時都有諗番起以前嘅事,令到情緒容易啲代入。」毓儀又感激驄哥、美儀姐幫她入戲:「驄哥同美儀姐戲裏戲外都好照顧我,變咗我更加容易代入到一家人嘅感情。」毓儀更大爆驄哥百厭行徑:「拍嗰場戲嘅時候爹哋(驄哥)對住杯咖啡吹泡泡,好好笑,我見到嗰一下都有啲擔心喊唔出,不過好彩冇事!」美儀姐霸氣喪鬧,大家都驚驚豬。人哋明明拍緊喊戲,驄哥就喺度吹泡泡,搞到毓儀差啲「破功」。羅毓儀呢場爆喊戲都好搶Fo。羅毓儀話自身經歷有助佢代入角色。
台慶劇《下流上車族》逢周一至五晚八點半翡翠台播出

麥明詩盛勁為舉辦婚宴 林作媽媽現身送祝福

麥明詩同盛勁為喺3月24號擺酒舉行婚宴,獲馮盈盈、鄭衍峰、同麥大力擔任兄弟姊妹團,一對新人甜蜜咀嘴,幸福滿瀉,Louisa喺結婚過程中多次開心到喊,好多朋友更祝福佢哋早生貴子,佢哋都話有呢個計劃,仲話會趁婚假養精蓄銳為生BB做足準備。

而呢晚劉佩玥、吳業坤、江美儀、陳庭欣、戴祖儀、郭子豪、鄧卓殷、丁子朗、洪永城、唐詩詠、黃德斌、翁嘉穗同老公都有到賀,但最驚喜嘅莫過於係Louisa舊愛林作嘅媽媽王莉妮現身,原來佢係以Louisa契媽身份送上祝賀,佢更大讚盛勁為好靚仔好型,自己個仔完全比下去,林媽媽仲話覺得好可惜,之前一直好想阿仔箍煲,最終事與願違。不過林媽媽阿仔都有託佢向Louisa送上祝福。

林作同裕美日前post出結婚相,問到林媽媽囝囝係咪都好事近?林媽媽竟然話林作影婚照係因為受到刺激,仲話自己安慰阿仔叫佢睇開啲,至於講到會畀裕美呢個準新抱幾多分?林媽媽似有難言之隱,只係話佢合格咋。

盈盈見證住好姊妹Louisa覓得真愛都好戥對方開心,佢仲話喺一對新人之間嘅互動,已經感受到佢哋係有幾恩愛,佢仲大讚兩人係最佳拍檔。至於兄弟之一嘅麥大力,之前喺美國滑雪傷腳,雖然仲要撐住拐杖,但大力都堅持上陣,認真唔話得,而Leonard就分享咗兩人相處嘅小趣事。

而啱啱再榮升做爸爸嘅洪永城,就再次同大家分享喜悅,佢仲話細女似媽咪多啲,而大女見到妹妹都好開心,仲鍚咗妹妹一啖添。

 相關推薦

熱門搜尋