陳凱琳與嘉穎暫冇外遊計劃 staycation掛念囝囝未能盡興

陳凱琳早前喺社交平台貼浴缸性感照，仲同老公鄭嘉穎放閃，二人撇低兩個寶貝仔，歎二人世界，呢日出席活動，講起同老公staycation享受婚後首次二人世界，佢大讚老公攝影技術有進步，又話當晚食飯係好開心，令佢哋有自己嘅me time，但到咗第二朝佢哋即趕去接小朋友放學，陳凱琳笑言好掛住囝囝：「試過就知道下次帶埋小朋友staycation開心啲。」

佢透露跟老公鄭嘉穎暫時冇出遊計劃，享受到囝囝探索香港，陳凱琳自認深閨：「除非係公司上要飛，我同先生都幾鍾意留喺香港，因為同小朋友出trip比較大件事，要買咁多張機票，一齊飛去一個地方。」佢指大仔好細個去過旅行，不過阿仔應該唔記得，而細仔就暫時冇去過旅行。

此外，陳凱琳主持明珠台清談節目估唔到回響唔錯，有次坐的士聽到司機講喜歡佢個節目，佢覺得好開心，令佢覺得好有驚喜，之後佢計劃做飲食節目或者講小朋友嘅節目。