美麗戰場丨反骨琪被姦嗌到偏頭痛 李成昌自度摸大髀情節做鹹濕佬

無綫 55 周年台慶劇《美麗戰場》噚晚嗰幕「反骨琪」（蔣家旻飾）自食惡果，掀起網民熱話，劇情講述「世紀賤精」反骨琪原本獻計打算害哎吔家姐鍾家寶失身，仲自攜攝錄機欲拍下家寶被姦過程公諸於世，豈料威爺（李成昌飾）手下阿信（李啟傑飾）「叛變」迷暈琪琪，將其與家寶調包，威爺滿足獸慾後更露出奸險真面目，以佢同反骨琪嘅性愛片段要求琪琪「服侍」及接客，琪琪盛怒下拎起生果刀怒拮威爺，不過真正殺死威爺兇手卻另有其人……

對於反骨琪害人終害己，噚晚網民洗版式留言大嗌心涼兼抵死，對於壞人逐個開始「找數」，坦言「未試過睇得咁開心同興奮」之餘，又指被預告呃到，冇諗過劇情係咁，談及該場被姦戲，蔣家旻受訪時大讚昌哥事前與她做足溝通，開拍前對所有動作都一清二楚，又感謝幕後對佢好照顧，加上有打底，故拍攝時都好放心去演，蔣家旻又指拍出嚟手部同頸部均激動見紅：「我都冇諗過自己嗌到可以手、頸都紅晒，有史以來第一次，好真實！」
蔣家旻相隔十年再與葉念琛合作，多咗信任同默契，蔣家旻覺得最難演係浴室爆喊戲：「想喊但又要唔准喊，因為個角色好勝，唔覺自己有錯，咁到底要點樣呈現唔輸得但又委屈？呢場個情緒就好複雜，觀眾一定覺得你抵死，但你又想佢哋有少少同情個角色。」

李成昌自劇集播出後贏盡好評，從演以來演過無數膾炙人口角色，演大佬更係演得出神入化，佢笑言導演葉念琛話睇過佢做過好多大佬，今次被葉念琛勒令要「不一樣」，本身昌哥都擔心好難再有突破，後來終於諗到自己未做過鹹濕嘅大佬，李成昌叫導演開頭幾場畀兩個靚女同場，佢要摸大髀，令角色更加立體。講到噚晚表情極速遊走於得戚、險惡及無情之間兼「一秒變臉」，昌哥坦言過足戲癮！相關片段昨晚上載無綫官網後，三小時衝破十萬點擊次數，至截稿前（早上九時左右），點擊次數則已衝破20萬，留言超過250則。