台灣廣播電視金鐘獎今年破天荒分開兩日連續舉行，21號晚率先頒發綜藝部份獎項，入圍最佳主持人嘅候選者競爭激烈，最後由已經多次獲得提名嘅黃路梓茵同黃子佼以《婚禮歌手》得獎，成為今屆綜藝節目主持人獎嘅得主。

今年競爭激烈，事前各位候選人都似乎對獲獎信心十足，好似以《熙娣想聊》入圍嘅小S徐熙娣，就以非常引人注目嘅打扮現身喇。而以一分之微獲獎嘅黃子佼，事後就謙稱只係險勝小S，仲話小S一重新投入主持就即刻入圍，實力有目共睹呀。

而佼佼對徒弟Lulu嘅表現亦都非常滿意，仲話會送超級名牌手袋俾佢做禮物呀。至於新任最佳主持Lulu受訪時明顯非常興奮，出道10年終於獲獎仲令佢喺台上喜極而泣，佢仲多次感謝佼佼一直以嚟不問回報嘅支持同教導呀。

至於賽前呼聲甚高嘅小S事後亦都以一貫幽默恭喜對手，對只以一分之微落敗坦白表示失望，不過一樣對佼佼同Lulu我獎表示佩服呀。

吳宗憲早前公開批評大會將頒獎禮分兩日舉辦，呢日另一重量級主持徐熙娣，就認為主辦單位用兩日其實花費更多成本製作喇。