仲有唔夠一個月就係無綫電視55周年，視TVB如母校嘅馬浚偉繼2011年嘅《大廚出馬II》後，相隔11年再出馬，為一連9集嘅台慶大型廚藝節目《黃金盛宴》擔任主理人，打造「黃金盛宴」款待歷年一眾飲食節目VVIP，包括總經理曾志偉、著名食評家蔡瀾、1985年香港小姐冠軍謝寧、資深廚師周中、薛家燕、周汶錡同莫樹錦醫生。

馬仔任主理人嚴選台慶佳餚

為隆重其事，主理人馬仔號召咗9大最具代表性嘅「星廚」出手，好似《阿爺廚房》嘅 李家鼎(鼎爺)、《食平 D》系列嘅 肥媽 (Maria Cordero)、《疫境廚神》 黎諾懿 、《煒哥的味道》 陳煒 、《美女廚房》評判 Jacques Kagi (祈積奇)、《煮場爭霸》嘅 黃亞保 (保哥)、《女人必學100道菜》嘅三姐、《煮戰》總冠軍行政總廚級人馬 譚以健 ，同埋曾參與《美女廚房》嘅星級甜品師 Amanda S.。

佢哋會喺聽晚(24號)播出嘅第一集率先晒冷，9大星廚會以「一人一菜式」展示別具個人風格佳餚；而第二集起，每集會有2至3名星廚輪流登場，佢哋會根據特定主題走訪各大知名食府汲取靈感，再協力炮製多道菜式。再經由主理人同「星級嘉賓」嚴選出優秀菜式加入「黃金盛宴」菜單。

首周亮相嘅「星廚」陣容包括肥媽、鼎爺、諾懿同保哥，「星級嘉賓」就請嚟 陸浩明(6 號) 、  譚玉瑛 、 陳敏之 同著名堪輿學家 蘇民峰 ，今個星期焦點肯定係破天荒首度聯手下廚嘅肥媽同鼎爺喇。佢哋初次碰頭時，仲被馬仔追問係咪曾經不和，肥媽仲回應：「佢唔係我嘅， 我唔係佢嘅，點會嘈交啫！」引來全場爆笑。

不過更精彩嘅喺後頭，肥媽同鼎爺兩雄相遇，面對肥媽一聲喝令「喂幫吓手啦」，向來霸氣十 足英明神武嘅鼎爺竟變「綿羊」無奈笑道：「真係陰公」，馬仔見狀就笑指畫面溫馨又有愛喇。

肥媽鼎爺聯手炮製好滋味首集主題係「頭盤」，肥媽就再發揮搞笑本色話：「以前淨係畀啲啲Budget就要我諗好多嘢，而家無限Budget，幾大整靚嘢！」最終肥媽同鼎爺利用蟹、黑松露、魚子醬等貴價食材，合力炮製出4道佳餚。記得留意聽晚起播出嘅《黃金盛宴》，一齊睇吓有幾豐盛啦！

《黃金盛宴》24號起，星期一至三晚 22:30 翡翠台

由肥媽、鼎爺同游嘉欣主持嘅飲食節目《肥媽李鼎》嚟到最後一集，今集主題係「最多謝的人」。肥媽話最想多謝已故林嶺東導對自己嘅知遇之恩，佢話當年自己喺一間Disco唱歌，而林導就成日嚟捧場，肥媽憶述：「佢覺得我把聲似黑人，之後叫泰迪羅賓作咗首黑人怨曲畀我唱，點知一唱周街啲人叫我 『嘥氣』，咁就入咗呢行。」肥媽分享同林導嘅趣事，佢說：「佢嗰時晚晚嚟好似返學咁，我每晚都會唱《We Are The World》，呢隻叫校歌，我就叫校長， 嗰時好好玩，真係唔捨得。」
肥媽感謝已故導演林嶺東嘅知遇之恩。鼎爺感激珍姐力薦自己。
而鼎爺就指非常多謝珍姐曾勵珍，因為對方由自己做藝員到轉做烹飪主持，對方都係極力推薦自己，鼎爺仲話即使自己有天大本事，但如果冇人畀機會都係冇用。鼎爺又講返當年拍攝節目《阿爺廚房》時，前後經歷咗三次試廠：「真係試到我忟，覺得我眼神惡同聲氣大，前前後後試咗三次，其實佢都好重視，如果唔係都唔會嘥錢試你呢個傻佬啦。」之後鼎爺仲即場模仿珍姐招牌動作「睇吓點」，喺隔離嘅游游睇到即讚好神似。
游游就多多林肯畀機會自己。游游為兩老炮製「游氏釀冬瓜」
至於游游最想多謝嘅人，就係搵佢拍劇集《香港愛情故事》嘅監製林肯，游游話：「我當時真係一個𡃁妹乜都唔識，佢夠膽畀一個重要嘅角色我做，佢真係好夠薑，如果冇佢當初咁大膽選用我，就冇今日我坐喺度同兩位講嘢。」之後肥媽畀機會游游對住鏡頭向珍姐推介自己，游游竟然怕醜到面都紅埋。嚟到節目尾聲，身為廚房Killer嘅游游為答謝肥媽同鼎爺嘅照顧，非常有心地提早到場炮製「游氏釀冬瓜」慰藉兩老。
肥媽畀機會游游對住鏡頭向珍姐推介自己。
另外，肥媽自爆早年曾畀人屈過檔亞視，令佢無份參演大騷導致收入大減，後來肥媽索性疊埋心水做生意，佢說：「其實我要多謝佢，如果冇佢，我都唔會開咗 18 間卡啦 OK 同有 Live Band 唱歌嘅地方。」肥媽透露呢個屈佢嘅人係好出名，大家都認識嘅，想知道更多細節？記得留意收睇喇！

《肥媽李鼎》最後一集 24號 22:30 翡翠台