年度籌款節目《星光熠熠耀保良》22號舉行，大批嘉賓包括身兼主持又同Yumi合唱嘅汪明荃輪流上陣表演，日前傳出Do姐鄭裕玲婉拒續約，同TVB結束44年嘅合作關係，呢日Liza姐就話知道後非常驚訝喇。

Liza姐又話往後相信依然會有機會同Do姐合作，又讚新一輩女主持表現不俗，假以時日一定可以有更好表現，仲話自己啱啱已經續約兩年呀。

4年前同黃心穎喺《保良》舞台合唱嘅許志安，喺正式復出之後呢日亦喺《保良》舞台重新出發，呢日戴住婚戒出現嘅佢，雖然未有正面回應過往舊事，不過就對新歌成為電台流行榜冠軍非常開心，仲話對自己係非常大鼓勵喇。

佢又提到希望明年上半年推出新全新EP，又話老婆Sammi一直喺身邊鼓勵，自己非常感激呀。

呢日After Class四小花都有現身，Gigi炎明熹對《聲夢2》嘅成員將會面對海外學員嘅踢館賽，就回憶起自己當日參賽時嘅片段喇，而Yumi鍾柔美同Windy詹天文呢晚分別同Liza姐仲有露雲娜合唱，Yumi就話心情比上一次同阿姐放騷鬆咗唔少，Windy就話自己擔心冇戀愛經驗唱唔出《豆芽夢》嘅感覺呀。

「志明」張馳豪喺《美麗戰場》嘅表現獲唔少觀眾讚賞，原來就連Chantel姚焯菲都一樣有追，仲話非常鍾意阿寶同家明呢一對呀。Aska就話佢同阿寶之間之後仲會有啲事發生，仲話想嘗試吓做衰仔嘅角色呀。
泳兒嘅新歌繼續暗黑風格，不過呢日佢就話同現實中嘅自己有唔少嘅反差喇，仲話情侶之間一鬧交自己就會即喊呀。而馮允謙亦都推出同人生選擇有關嘅新歌，佢仲希望大家可以勇往直前呀。

呢日谷胸現身嘅譚嘉儀12月就會展開佢嘅處女音樂會，近日佢就為舞蹈不停苦練喇。至於準陳太連詩雅早前確診，仲搞到佢非常焦慮，因為工作安排損失唔少嘅佢，仲話緊張到日日自己檢測呀。

再次推出高質錄音專輯嘅陳逸璇透露新碟銷量不俗，佢仲話即將會推出另一格式嘅新版本，明年仲會推出黑膠唱片呀。

樂壇首張成績表《新城勁爆頒獎禮2022》喺噚晚（29日）圓滿結束，總共頒發63個獎項，張敬軒連奪3個大獎，成為大贏家，張敬軒因確診未有現身，而炎明熹與曾比特各擸兩個獎，分別係「勁爆突破歌手」及「勁爆歌曲」。

炎明熹坦言一直好緊張，成日怕出差錯，佢感激楊千嬅提醒冇人一嚟就做到十全十美：「如果唔係，你就遺失咗一班同你一齊成長嘅人，呢句說話係點醒咗我，喺過往一年自己受過唔同鍛煉，我覺得人生仲好長，需要更加多嘅磨練，成為一個更加好嘅自己。」之後炎明熹將朝向女歌手獎為目標。

鍾柔美同After Class同時奪得新人獎，佢哋首度公開跳唱新歌，Chantel姚焯菲嘅《#BFF》奪得「勁爆新媒體歌曲」，事前已跟鍾柔美及詹天文交流出席頒獎禮心得，Chantel續道：「佢哋今日終於體驗到真係好緊張，我覺得係成長一部份，知道攞獎真係開心嘅事，同時要面對咁大班觀眾，其他歌手嘅粉絲，其實係會緊張，學習嘅一部份。」鍾柔美則開心獲「新人獎」令佢有動力去做好自己。

曾比特今年表現亮眼，喺台上講得獎感言時太緊張，忘記答謝前輩林子祥、莎莉、李玟及楊千嬅喺《聲生不息》嘅教導，希望趁住呢個機會好好多謝佢哋。

JW王灝兒奪女歌手獎及「勁爆新媒體歌曲」，佢承諾開騷答謝支持：「獎項呢樣嘢好神奇，好似好耐冇掂過音樂獎，我2023年除咗努力演戲，一定繼續造歌，希望2023年有個音樂會畀大家。」馮允謙及欣宜冧莊男女歌手獎，佢哋感謝歌迷愛護同支持；雲浩影喜獲「新人獎」，獲Eason大讚有把靚聲，佢覺得超開心：「好幸運佢有聽過我嘅歌，同埋有share，好威！呢件事我可以講成世。」