67歲前商台主持蘇施黃曾喺2005年戰勝乳癌，上周四（20號）蘇施黃拍片自爆患大腸癌第三期，做完手術後留院8日，靠食物保持心境開朗，準備做化療。事緣蘇施黃早前發現血便情形越來越頻繁，趁工作空檔上周到港怡醫院做健康檢查，上星期二照腸後，院方已立即出報告，發現患大腸癌第三期。

蘇施黃身處醫院，見佢精神不俗，透露當初因為發現屙鮮血，上月26日入院檢查。
蘇施黃坦言家族有腸癌患者，醫生擔心有家族遺傳，蘇施黃續說：「屙血情況好似痔瘡咁，屙三幾日又停，停咗過幾月又屙鮮血，以為係痔瘡，不過痔瘡會痛，又冇痛過，再去睇醫生，叫我穩陣啲去照腸，因為我父親有患大腸癌。」
蘇施黃指等報告一出，醫生直接安排佢做手術，需要切15cm腸，蘇施黃解釋：「report出嚟，醫生話唔係咁好，好似係腸癌，而家立即拎去檢，晚上就知道，真係要切割，聽日就可以切，於是我星期三切割咗我嘅腸，喺我大腸嘅轉彎位，唔係喺直腸，切咗15cm，嗰度有個腫瘤，附近拎咗25粒淋巴，其中三粒受感染。」

蘇施黃指切咗15cm，嗰度有個腫瘤，側邊攞咗25粒淋巴。

蘇施黃又指幸好並冇擴散：「醫生話肯定唔係第一期，原來驗咗出嚟係 大腸癌第三期，為咗穩陣起見，你做完手術再照吓有冇走咗去身體其他地方，譬如骨或者胸，結果係冇擴散到。」蘇施黃稱第三已經落床走動：「做完手術嗰日瘟瘟沌沌，切嗰日都好精神，第二日吊水，我有落床坐咗一陣，第三日我要求唔要吊水，我要拔晒啲喉，尿喉、黏住大腸嘅喉，拔埋鹽水，可以自行進食液體食物，自己喺房行來行去，再行出走廊，我將手放喺後面，等自己挺直啲嚟行，傷口係微創就好似五筒咁、肚臍側邊開咗四個窿，呢四個窿係放內窺鏡，肚臍底有「一」字傷口，呢個係拎條腸出嚟，就算郁來郁去、擰來擰去都唔太痛，而家啲微創手術非常好。」同時佢感謝醫護人員悉心照顧。

蘇施黃做完手術後留院8日，佢大讚膳食不錯。
蘇施黃目前靠食物保持心境開朗，佢指而家仲有另一考驗：「仲要做化療，做化療就冇而家咁得戚，不過唔緊要，化療完又擦過，我啲朋友話化療前先吃為敬，化療後再吃為敬。」之後佢擺出good手勢！

蘇施黃目前靠食物保持心境開朗，佢指而家仲有另一考驗。

2005年不幸患上乳癌嘅資深演員兼主持 溫裕紅 19號離世，終年54歲。同佢一樣係藝人之家成員嘅 韓馬利 回應查詢時，指Esther數年前癌症復發，近月情況轉趨嚴重，最終不敵癌魔病逝，同Esther相識多年嘅 寶珮如 亦喺社交平台悼念故友。

據稱溫裕紅嘅喪禮將喺下月中舉行，之後將奉移火化。

為TVB服務23年；曾主持《都市閒情》長時間、《文化新領域》等節目，又先後拍攝逾90部劇集嘅 溫裕紅 ，近年參與拍攝《七公主》同《食腦喪B》等作品，亦成為佢演藝人生當中嘅告別之作。

當年溫裕紅喺患乳癌後接受化療同大手術，之後身體逐漸好轉康復，亦繼續參與唔同演出，仲以過來人身份同一樣曾患上癌症嘅 林淑敏 互相支持鼓勵成為好友。到2020年溫裕紅逐步引退，有指佢其後歸隱田園生活，亦不時相約友好郊遊行山，可惜近日依然與世長辭息勞歸主。