Amber行澗換詭異紅拖爆笑 Nicole忌水浮潛勁緊張

《港女野人》嘈完一輪，話咁快已經係最後一星期播出，24號同今晚(25號)兩集， 四位港女野人將分別挑戰「行澗」同「潛水」，本身擁有專業潛水教練執照嘅Honey就由「野人」升呢做「達人」，親自向Jessica同Nicole傳授自由潛水Freediving技巧，佢哋仲親身體驗「靜態閉氣」。

 一身泳衣同潛水衣盡顯驕人身段嘅佢哋，喺水底享受期間先後遇上水母同膠袋， Jessica仲被嚇到連環尖叫。Honey對浮潛遇上膠袋仲感嘆話：「水底世界好靚好寧靜，希望大家多啲珍惜。」

之後Nicole同Jessica喺Honey親身指導下，學習「靜態浮潛」前要掌握嘅呼吸技巧，有瑜伽底子嘅Jessica仲好快上手。到「實戰」一刻，作示範嘅Honey喺水中閉氣長達三分鐘依然冇異樣，不過偶爾「抽搐」就嚇得Nicole同Jessica非常緊張喇。

而之前有浮潛經驗嘅Nicole，由於不諳泳術每次都要專 人陪同；今次雖然有Honey全程傍實，仲親授「腹式呼吸」大法，不過Nicole閉氣前依然勁緊張，最終半分鐘就上水；反觀Jessica 全程表現放鬆仲被大讚有「潛」質呀， 不過原來佢對喺海游水有陰影：「因為細個試過喺海中心反艇浸親。」Jessica又謂一早聽說潛水很易上癮，而自己亦「中招」想考個潛水牌去外國潛水，又大爆拍攝趣事：「拍緊嗰陣我見到個鏡頭隊咗埋嚟我面前好想笑，所以就上咗水。」

Nicole就話： 「我以前有玩過浮潛，我覺得好好玩，因為可以感受到水入面嘅寧靜。不過 freedive真係需要好大嘅勇氣，現場幕前幕後同事包括Honey都唔想我冒呢個險。」 

四位港女野人喺噚晚一集難得齊腳，仲喺「山藝達人」達Sir帶領下體驗行澗；由於當日天氣麻麻，起程初段一直落雨，行澗時雖然全程有四大猛男傍實，不過一樣步步 驚心。四人之中以出名細膽嘅Amber最為遴迍，尚未起步已跣腳，好彩有兩名「助教級」猛男捉實先冇發生意外；之後Amber上落石塊時，仲一度要出動三女三男協力又拉又推先順利完成；而「體力之鬼」Honey就全程「自強」mode，出手出力協助同伴之餘，行澗期間仲好似蜘蛛俠咁靈活。

最終由於天氣愈見惡劣兼狂風暴雨，眾人被逼折返安全地方，Amber仲因一對「騎呢紅拖」成為笑柄。事後Amber仲妙論死撐：「我諗住返屋企嗰程著架咋，點知落咁大雨要換鞋啫，我屋企冇其他鞋喇！」