愛情黑魔法為求復合伴屍拖手眠 Susuca被前度攞八字做法事箍煲超驚

聽日（27號）11點播出《不正常愛情研究所》，由J2ers 黃紫恩（Jojo）、吳兆麟（Alan）、胡敏芝（Karen）連同兩位客席嘉賓麥惠琪（Susuca）、文頌男（Koba）主持。呢集主題係「愛情黑魔法」，搵嚟泰國法科Call師傅現身講個案，講到有女仔為挽回男友嘅心，可以去到幾盡！

下星期一就係萬聖節，各主持扮鬼扮馬提前過節，Susuca同Karen話萬聖節係容易分手嘅日子。Susuca講起16、17歲時，萬聖節同男朋友去主題樂園玩，一心諗住入鬼屋，估男友會保護自己，豈料入到去男友被嚇到唔知跑咗去邊，搞到佢勁嬲，出去即刻講分手，去一轉主題樂園、一轉Halloween就散咗；Karen就話有位女性朋友，化濃妝出席萬聖節party，原本同一位男仔打得火熱，之後去after party，女仔一卸妝就嚇走咗個男仔，恐怖過恐怖片。

講到萬聖節自然離不開啲神怪話題，Susuca繼續「客串」做「有故事的人」。她話近日無意間發現前度同一位法師inbox對話，前度問法師「請問做咗法事未」，內附一張照片，喺法壇上見到自己生辰八字，越睇越心驚，Susuca回想當時情況︰「嗰時所有嘢都搬走晒，好決絕要斷絕來往。唔知點解無緣故又躝返去復合喎。」Susuca思前想後，嗰段時間正正係男友找法師嘅日子，佢諗番都覺得恐怖。

泰國法科師傅Call先為Susuca解說相中法壇嘅作用，又話中降原來有徵兆、有樣睇，從氣息同身體變化可以辨別，Call師傅更講做和合法事同落降頭嘅故事，各主持聽到面有難色。

師傅又提到多年前有位女仕，為求同男友復合，不惜到泰國伴屍手拖手瞓咗一晚，當中提到死者冤氣、決定法事嘅效力，更附有圖片，嚇到在場嘅Karen同Susuca毛骨悚然，反而Jojo表現最冷靜，仲表示會考慮，前題係「有幾愛個男人同執著」。師傅表示事後會為死者做功德超渡，算係一件善事。法事後3個月，該女子似乎有所參透，最後選擇放下。呢集《J2ers︰不正常愛情研究所》信則有，不信則無，膽小者要小心。

《J2ers︰不正常愛情研究所》逢周四晚上11點 J2 （82台） 播映