繼之前黑絲上陣誘惑老公之後，江美儀喺《下流上車族》又再出招，以被激嬲做藉口著晒絲質吊帶睡衣引誘老公林敏驄喇。呢日一家大細同埋兩個囡囡一齊做訪問，美儀姐就話唔明家庭劇都要咁多花臣又黑絲又睡衣，阿驄仲賴係工作人員要求喎。

冇嚟正經嘅阿驄仲話，本來劇本嘅親熱戲仲豐富，不過因為實在頂唔緊而要求刪除喎。正所謂夫妻之間唔親熱又點得嚟生兒育金呢？佢哋喺劇中嘅兩位靚千金郭柏姸同羅毓儀就話呢對父母體貼到不得了，知多蚊就即時有驅蚊用品，拍劇時間長咩仲有Daddy成日萬歲呀。

首次拍劇嘅阿驄就話一切都係因為跟美儀姐學戲嘅學費，美儀仲爆阿驄戲裡戲外都一樣體貼認真喎。但係把口唔識停嘅佢就一樣唔收口，句句都要搞搞震先安樂喇。

Yuki 羅毓儀 除咗早前喺《下流上車族》演出深得唔少觀眾歡心之外，近日佢亦將會進軍樂壇，而日前踏入27歲生日嘅Yuki，仲同一班Fans一齊開生日會慶祝，但係同時正拍攝《愛．回家之開心速遞》同《非常檢控觀》嘅佢，就因為幾乎趕唔切到場，好在最後都可以到場同大家見面咋。

首次同Fans一齊過生日開Party嘅佢，仲話成廿年未曾開過生日會，難怪講起都咁興奮啦。Yuki仲話新一希望健康之餘，演技同音樂上表現都有更多進步，又話希望新歌可以盡快同大家見面，仲爆出好快會喺交通工具會見到佢咁話喎。