美麗戰場｜一言Sir被陷害失禁兼失語 陳瀅劉佩玥眼神露殺機 何依婷奸計得逞

無綫55周年台慶劇《美麗戰場》聽日將播出大結局，噚晚有兩大高潮位，先講一言Sir（陳山聰）遭家寶（陳瀅飾）及琳琳（孫慧雪飾）設局陷害當眾瀨尿兼被狂影；另一高潮位就係龐子珊（何依婷飾）向阿哥宇少（方力申飾）攤牌，一口氣將積壓多年嘅冤屈爆發出嚟。

為咗「澄清」腦退化，一言Sir搵嚟相熟傳媒接受專訪，豈料遭家寶及琳琳事先將藥物調包成興奮劑，就喺「澄清」大計，進入尾聲期間興奮劑藥力發作，一言Sir瘋狂手震兼當眾瀨尿，山聰由撕心裂肺嘅咆哮，到青筋暴現，再到失語，令病發畫面像真又難堪。

一言Sir極度狼狽之際，家寶殺入現場「扮好人」終止專訪，轉過頭攬實一言Sir即一秒變臉，再次刺激一言Sir，由陰險轉為陰陰嘴笑再轉為狠毒，層次豐富。之後靜兒緊接出場叫同行傳媒狂影一言Sir醜態，其間盡情地對一言Sir冷嘲熱諷，表情涼薄，最終家寶與靜兒皮笑肉不笑地望向鏡頭，令人極盡心寒、戲味爆標，呢幕噚晚喺不同討論區均引起熱討，網民對山聰演技讚不絕口，亦對一言Sir遭遇大感同情，直指忘恩負義嘅家寶果真如葉念琛所指比「反骨琪」（蔣家旻飾）更奸。

TVB官網今日發佈呢場嘅拍攝花絮，原來山聰「失禁」場口係由葉念琛親手炮製，只見葉導向山聰重要部位倒咗大量類似茶嘅液體，叮囑攝製隊要拍下做花絮，相當搞笑，山聰受訪時笑言：「葉導今次搵我嚟就係要考考我啦！」鏡頭後談笑風生嘅山聰坦言拍攝手震場口前，事先要經過不斷練習，並分享手震心得，原來係唔可以兩隻手用同樣方式一齊震，因為另一邊神經會控制得唔好。

何依婷向來予人感覺清純，呢次破天荒飾演心計千金，噚晚直踩阿哥屋企攤牌一幕，更將其陰暗面「晒冷」，對於父親龐國棟（姜大衞飾）偏心阿哥，子珊一直懷恨在心，眼見宇少因為娶家寶犯下大錯「失金」又「失勢」，子珊自然勁心涼，踩上門攞威，更要求阿哥放棄尊嚴高調撐自己升職，並用阿哥賴以維生嘅「零用錢」作要脅。

子珊開口埋口話阿哥廢柴，臨離開前一時笑、一時聲嘶力竭爆Seed鬧阿哥，自爆處心積慮想爹哋踢宇少出龐家，終於畀佢得到，講完即拋出超狠眼神準備離去，對宇少作最後警告，「如你夠膽唔嚟，我保證你以後冇好日子過」，依婷事後透露與葉念琛見面傾劇本時，對方已畀咗實用嘅「奸角貼士」，提醒何依婷唔好覺得自己奸，因為冇一個奸角會覺得自己係奸嘅，只要諗係以自己嘅利益出發，何依婷感謝葉導細心教導。

台慶劇《美麗戰場》周一至五晚九點半翡翠台播出