劇集《隱門》有唔少動作戲份，8號晚一集動作戲嘅擔當就由陳展鵬負責，劇情講述陳展鵬為追捕前度嘅哥哥而展開追捕。由於呢場戲要陳展鵬唔只要擒高擒低，仲要好似體操王子咁做出跳馬般嘅動作，相當考腰力。不過因為追逐現場相當多鐵枝，所以喺拍攝時兩位演員都相當小心。而根據無綫官網上載嘅花絮片，陳展鵬好多動作都做得相當乾淨俐落，而且同對手過招後都會拍拍對方予以安撫同鼓勵，盡顯暖男面。
呢場戲陳展鵬要擒高擒低。重體操王子上身。
而同場另一驚喜，就係飾演陳展鵬前度嘅演員，就係曾經同佢喺《巨輪》內合作過嘅貝安琪，雖然貝安琪只係閃現幾個鏡頭，但唔少觀眾都話勾起當年《巨輪》嘅回憶。
貝安琪嘅出現令大家諗起《巨輪》嘅畫面。
除咗動作戲外，呢集亦有令人落淚嘅洋蔥位！KK張國強飾演患上認知障礙症嘅志強，由於對意外離世嘅太太(李君妍飾)念念不忘，憶妻成狂嘅佢喺街度見到同愛妻打扮相似嘅女人，即上前纏住對方。飾演KK女兒Madam Yeung 嘅湯洛雯，忍痛表示母親已離世多時，諗住可以令爸爸清醒，點知卻令志強大受打擊，仲爆Seed 連環掌摑對方。
危險動作切勿模仿。
KK接受訪問時透露，接拍《隱門》前獲監製 Amy 姐親自致電講解角色：「佢話想我同以前好唔同，話今次個角色唔係咁精明。」KK表示為了演得更似一名老者，佢除刻意留咗白頭髮，仲着上假肚腩同塗咗皺紋膏。

談到掌摑湯洛雯嘅戲份， KK話因為同對方爸爸湯鎮宗份外熟稔，所以同靚湯嘅感情都好好，喺拍攝前佢哋已經有良好溝通，所以拍攝時可以順利一Take完成。
KK怒摑靚湯。好虐心呀。
不過因為正式拍攝時，佢哋都係順住當時情緒去演，所以最終加咗好多巴掌，KK話：「我同湯洛雯溝通完，佢覺得有必要真打，只係佢估唔到連續咁多巴。因為大家跟住咗個感覺走，個情緒爆發起上嚟就打咗好多巴，多到我都唔記得咗有幾多吓。」KK又指有特別留意打巴掌嘅節奏，因為佢演嘅角色唔同後生仔可以打得咁快，所以要一巴一巴咁打，而力氣就要喺有氣同冇力之間。

《隱門》逢星期一至五 20:30 翡翠台