星光路上丨錢嘉樂憶艱辛歲月曾傷重危殆 感謝洪金寶曾志偉提攜後輩

星光路上丨錢嘉樂憶艱辛歲月曾傷重危殆 感謝洪金寶曾志偉提攜後輩

錢嘉樂日前接受 《星光路上》專訪,錢嘉樂一向俾人感覺鐵漢柔情、肯搏肯捱,一直有培育新人嘅心,不愧為圈中大師兄。錢嘉樂15歲左右開始入行,跟哥哥錢小豪做龍虎武師,錢嘉樂坦言要吃得苦,譬如喺泥氹扮死屍、「吊威也」喺上面幾個鐘都冇人理,錢嘉樂笑言:「周身骨痛,啲人仲要放食飯,呢啲唔係拍出嚟嘅笑話。」

錢嘉樂憶述1987年拍電影《東方禿鷹》曾入院:「當時未出名,有一份報紙寫洪家班一位龍虎武師傷重危殆入院,傳咗畀我阿媽知,當時我阿哥帶我阿媽即刻飛去菲律賓,我媽唔係演員,佢當時扮笑嗰個笑容,佢以前知我拍戲,唔知我做咩、唔知有幾危險,我唔會話今日跳8樓幾威,當刻感覺好似見最後一面,我成日提醒自己,唔想再有嗰個畫面。」錢嘉樂坦言一度諗過轉行,經過呢段艱辛經歷。

錢嘉樂指當年因為洪金寶點名叫佢拍殭屍片做男一,那一刻心情好開心,錢嘉樂入TVB拍劇,當中最經典作品就有《烈火雄心》、《封神榜》、《王老虎搶親》同《拆局專家》等,錢嘉樂指一向拍兄弟情嘅戲份好有把握,拍嗰陣大家都開心,錢嘉樂喺《封神榜》飾演楊戩,與同劇嘅湯盈盈當時未擦出愛火。

錢嘉樂指香港電影演員周潤發、劉德華、梁朝偉都係TVB藝訓班出身,佢覺得公司制度成功訓練到一班演員,趁後生一定要拍劇,佢覺得有今日成績係因為「大哥大」洪金寶、曾志偉、午馬導演、爾冬陞導演等前輩教佢所得,錢嘉樂指識曾志偉係喺五福星年代:「一個演員、一個武師,以為佢口花花撩吓女仔,後嚟熟咗,跟佢去踢波,見志偉有去做慈善,佢會關心社會,好多人走去多謝佢,好多新導演都多謝佢,啲新導演好多第一套戲都係佢畀機會,志偉改變咗我。」錢嘉樂坦言做香港動作特技演員公會會長,亦係受曾志偉影響,明白參與公職同慈善回饋社會,佢希望好好培育後輩。

錢嘉樂笑言以前收工通常諗去邊玩,自從兩個寶貝女出世,錢嘉樂多咗留喺屋企,不過佢就冇教愛女打功夫,經常陪愛女玩,跟老婆盈盈相處亦係有商有量,生活美滿。

星光路上|鄭俊弘暑假躺平被母藐變入行 初出茅廬演戲狂食貓麵撈家貼心指教

參加歌唱比賽入行嘅 鄭俊弘 ,當年一個暑假返港嘅朗懶下午,估唔到因而媽咪嘅睇唔過眼,而令一向鍾情歌唱,同時又熱愛中國功夫嘅佢報名《全球華人新秀歌唱大賽》而入行,其後又修讀訓練班進而參與唔同演出。

初畢業實習如入大觀園,對演出就無甚概念,日日食「貓麵」都屬平常事,越驚越錯、越錯又越驚,慢慢由錯誤中學習成長,當中亦有唔少前輩嘅無私指教,《與諜同謀》嘅合作就私下袋唔少落袋,而撈家亦解釋係因為劇集嘅父子情而不時戲外相約佢傾談見面。

最近拍出嘅《再見.枕邊人》略帶古惑嘅Fred,拍攝時亦刻意將浮誇嘅奸詐一面表達出嚟。

近年結婚再成為人父,Fred亦成熟唔少,仲有意思再追一胎,希望下年就會成事再做Daddy呀。

 相關推薦

熱門搜尋