超能使者 ｜ 阿Moon叫聲銷魂展鵬谷到面紅 詩詠麻甩演出飄有味畫面

以普通人意外獲得超能力為題材嘅台慶劇《超能使者》，萬聖節晚正式首播，鍾孝年( 陳展鵬 飾)同喬若嵐( 唐詩詠 飾)因為一次誤會成為歡喜冤家，某日佢哋同時搭上「亡命小巴」遇上意外，生死一刻人生過往碎片式畫面喺腦海中閃現，受重傷嘅佢哋即場接受急救，仲「意外」獲得唔同超能力，只係二人仍未知曉。

首集短短一小時嘅劇情相當多元，除咗搞笑、輕鬆同動作之外，亦不乏感性催淚、 大型交通意外同特技場口等震撼性畫面，角色設定既新鮮又鮮明； 唔少觀眾大讚節奏明快、輕鬆搞笑無悶場，加上後段已展開「超能」事件夠吸引。

今次扮演市井又市儈足底按摩師嘅展鵬，亦係劇中嘅「搞笑」擔當，好似佢同劇中太太阿Moon 劉佩玥 嘅閨房戲，飲過媽媽（程可為 飾）炮製嘅「壯陽湯」之後，因為老婆享受按摩叫聲而慾火焚身，唔止滿面通紅，猴擒苦惱樣更係啜核，獲觀眾大讚生鬼，對此展鵬都話：「可能大家覺得我平時講嘢好老正，唔適合做喜劇，但其實我好期待做喜劇，好多謝監製文偉鴻畀呢個角色我，令我好 Enjoy。劇入面個髮型係我自己剪，衣著亦係最簡單，希望演繹到一種真實嘅共鳴感。」

而負責「呻吟」嘅阿Moon就笑指拍攝時毫不尷尬：「反而最搞笑係監製示範我睇點做！呢幕戲係搞笑為主，所以拍時冇諗咁多嘢，反而係為求目的不擇手段，盡情去演。」

至於詩詠亦突破以往斯文靚女同專業人士形象，扮演臨記判頭嘅佢展現粗獷一面，其中一幕以毛巾抹胳肋底嘅場口仲麻甩味滿瀉，見畫面有味道，令觀眾笑到碌地。詩詠話：「因為冇演過喜劇、冇優勢， 所以我交晒畀監製，一入劇組就咩都唔諗，每日開工前都空白咁去，所以我演嘅時候完全冇理其他人會點睇我。」

首集另一重頭戲係游氏母女墮樓戲，劇情講述Q姨胞姊喬若詩( 楊卓娜 飾)疑遭丈夫游國棟( 吳家樂 飾)多次家暴，為女兒選擇啞忍嘅若詩，之後離奇墮樓身亡，更疑似同國棟有關。呢幕戲除咗展現現場實拍同CG後製所花費時間同心血成果，阿鏈亦因此意外發現自己擁有「停頓時間」異能。

呢個場面其實隱藏唔少難以控制元素，演員同CG組事前要反覆多次綵排，當日劇組仲出動兩組威吔佈置天井雜物飛散陣，同營造若詩女兒凌空嘅場面。呢場墮樓劇情亦引起唔少觀眾討論，紛紛揣測「游氏」母女墮樓真相。