下流上車族丨林敏驄率演員落區派愛心飯 江美儀被郭柏姸讚似少女

《下流上車族》演員林敏驄、江美儀、鮑起靜、郭柏姸、鄧智堅、關曜儁、林景程及監製關文深落區，與「深水埗明哥」陳灼明一齊向公公婆婆派愛心飯，不少街坊係《下流上車族》捧場客，大讚江美儀靚女，又讚鮑姐打麻雀犀利。

「車總」林敏驄同江美儀承諾劇集收視衝破30點，佢哋就落區派愛心飯，但而家仲未達標，佢哋就「找數」，林敏驄指講咗便要做，江美儀稱上星期又再成為收視之冠，所以呢日派愛心飯，林敏驄續道：「過咗《東張》、再過埋《愛‧回家》、過埋《獎門人》。」

鮑起靜有一場戲化身「雀后」大戰車總同「哈比家族」，佢笑言戲裡戲外都係麻雀高手，鄧智堅同關曜儁唔識打台灣牌，處於水魚級別，每次執「道具牌」都要鮑姐提點，鮑姐拍打牌戲完全唔覺得眼瞓，阿驄笑問：「係唔係真係喺麻雀館撈過?」

講到江美儀喺劇中誤會袁文傑，以為對方有意追求，「芊芊」郭柏姸覺得美儀姐演得好似心花怒放嘅少女，明哥亦有睇《下流上車族》，佢睇好林敏驄爭視帝。