麥皓兒圓歌手夢出專輯 盼衝擊今年樂壇新人獎

細細個就有個歌手夢嘅麥皓兒，最近終於夢想成真推出首張專輯《愛就愛》，呢日佢喺戲院舉行新碟記招同簽約儀式，仲即場首播新歌MV。除咗男友丘梓謙現身送花同公仔撐場外，佘詩曼、吳卓羲、陳自瑤、歐陽震華、林夏薇等圈中好友仲有拍片支持。

對於今次出碟麥皓兒信心滿滿，仲話要衝擊樂壇最佳新人獎呀！至於問到男友丘梓謙點撐女友？佢就話因為自己跳舞都有少少心得，所以女友拍跳舞嗰陣都有畀下意見。講到早前參加節目《香港小姐再競選》，麥皓兒就話好多謝公司舉辦一個節目，畀機會佢哋再次享受呢個舞台，同埋順便可以藉比賽嚟鞭策自己呀！