TVB台慶劇《下流上車族》噚晚嗰集講車氏夫婦關係面臨重大危機，車志明（林敏驄飾）得悉上司丁友善（袁文傑飾）對大女芊芊（郭柏姸飾）有意思，護女心切嘅車總喺超市當眾出手打上司，導致友善手指尾受傷，雯慧（江美儀飾）為老公向友善求情，惟車總堅拒道歉，更霸氣掹住友善耳仔嗌「唔撈」兼憤然離場。
志明為咗阿女芊芊同友善開拖。

車氏夫婦喺街上爆罵戰，雯慧要求志明返回餐廳向友善道歉，志明再度拒絕，將所有怒火發洩喺雯慧身上，雯慧嬲爆稱丁生追芊芊冇問題，人哋事業有成、有兩層樓揸手，志明聞言激動反擊：「係咪乜都講錢，乜都講樓呀？同賣女有咩分別呀？你當年嫁畀我又係為咗層樓！」此言一出即惹怒雯慧出手掌摑志明，雖然志明成功避開，但兩人不歡而散。
志明唔再吞聲忍氣，好霸氣咁辭職。
林敏驄、美儀姐呢場對罵戲拍攝時一Take過，講到二人異常投入，美儀姐笑謂：「想打佢好耐喇，拍呢場戲一啲難度都冇，我對住佢火都嚟，打唔中佢仲火呀，哈哈！」林敏驄笑指美儀姐事前買咗雞髀食埋打，驚打得唔夠力，美儀姐即大爆笑料反擊，指林敏驄拍攝期間被認錯做蔡楓華：「有個姐姐話好鍾意睇佢做戲，問佢係咪蔡生，我話邊位蔡生？個阿姐話蔡楓華吖嘛！」
雯慧扯火打老公，志明用手擋開，兩夫妻關係面臨重大危機！

雯慧開口埋口都係講錢，搞到志明好嬲。驄哥同美儀姐呢場對罵戲，你來我往晒演技，相當精彩。

驄哥轉身走咗去，真係戲味十足。

另一場戲講到中年失業嘅車總正在煩惱寫CV，寫來寫去只係逾33年超市管理經驗及曾獲取多個嘉許狀，阿力（關曜儁飾）同阿詩（林穎彤飾）見狀即嘲諷，「成日提住幾多年幾多年，即係提人哋你老囉」、「新嚟頂你個後生仔，大學讀管理碩士畢業，最緊要係咩？人工平過你呀」、「讀Degree嘅走去搬貨，碩士就做經理仔，我副學士都要躺平啦，你中五畢業……唉……」雖然阿力兩公婆句句有骨，卻反映出中年人士失業難搵工苦況。

呢場志明寫CV戲，反映出中年人失業難搵工嘅苦況。車總寫來寫去只係逾33年超市管理經驗及曾獲取多個嘉許狀。

台慶劇《下流上車族》逢周一至五晚八點半翡翠台播出

年初二繼續恭喜大家八面伶儱、財源廣進，而車氏一家同哈比族同大家一齊食開年飯！喺「萬千星輝頒獎禮典禮2022」中，劇集《下流上車族》有非常好嘅成績，呢日佢哋再次聚埋一齊，除咗同大家拜年食開年飯外，當然都有分享下劇內劇外嘅趣事啦！

拍完劇之後大家就各有各忙，林敏驄笑言兩個女郭柏姸、羅毓儀同老婆江美儀更加係忙到聯絡唔到，而哈比族一家鄧智堅、林穎彤、關曜儁就唔想聯絡都見到，證明好有緣份。問到車氏兩公婆點評價兩個女？驄哥即刻話佢哋而家因為爆紅，所以睇少眼都唔得，而美儀姐就話佢哋社交平台嘅相同片，少咗兩個女出現就會少咗好多like。

驄哥同美儀姐出名轉數快，不過郭柏妍同羅毓儀就直言即使同兩位前輩拍完劇，自己嘅轉數都冇增長，郭柏姸仲話老竇林敏驄次次出招都唔同，所以自己都唔係每次都可以接到對方嘅招數呀。食飯期間，美儀姐就爆細女羅毓儀一單笑料，佢話有次羅毓儀嘅真．媽媽就疑似頂唔順羅毓儀太煩，所以就同個女講：「你咁煩不如我賣你畀江美儀啦！」羅毓儀聽完之後尷尬大笑，主持鄭洐峰問到佢性格係咪真係咁煩？羅毓儀解釋自己喺屋企係非常依賴媽媽，所以對方先會咁樣講呀。

對於觀眾指驄哥同智堅嘅火花相當好睇，智堅就話多得驄哥畀位佢，又指劇中對方每次都用高踭鞋打佢，都係真打冇NG，而林穎彤就爆其實驄哥好溫柔，每次拍完掉高踭鞋之後，cut機後都會問返佢有冇受傷。

訪問入面佢哋各自分享拍攝趣事，點知驄哥突然指住細女羅毓儀，仲話演員入面佢係最專業，大家當然會問點解啦，驄哥即話：「佢真食！由於時間關係佢已經食晒！」之後仲同羅毓儀講食得多都唔會長高嘅，非常搞笑。

而被封魔音嘅郭柏姸，全程好少出聲，佢笑言怕自己開口會震散頭家所以先講少啲嘢，問到佢會唔會認真考慮跟驄哥學唱歌？郭柏姸就指之前聽到驄哥會寫一首《魔性大發》畀自己，點知驄哥一聽到，即刻叫郭柏姸跟身為歌手林穎彤學唱歌，仲笑言自己終於可以甩難。

主持鄭洐峰亦同佢哋玩二選一遊戲，當中問到「《下流》拍新版本，會想拍電影版前傳？定係音樂劇版？」、「續集要飛走一個角色，會飛走車太定Emma婆婆」呢啲超難答問題，想知佢哋點揀？Click入去睇片啦！