人氣歌手姚焯菲(Chantel )與張馳豪(Aska) 憑著選秀節目《聲夢傳奇》出道,短短1年人氣急升,佢哋開首個大型演唱會《Chantel x Aska #LOMLive Concert》,呢個演唱會將喺2022年11月27日晚上8時正假旺角麥花臣場館舉行,門票將於11月7號早上10點起於Cityline購票通網上公開發售,不另設售票處。
是次演唱會主題為 「#LOMLive」,意思是「Love of My 『Live』」,Chantel 及Aska希望透過演唱會將與一眾樂迷分享愛,演唱會門票分HK$780元及HK$580元。
16歲Chantel出道1年已喺樂壇創出佳績,對於今次與Aska有機會齊齊開大型演唱會,Chantel表示已開始全力以赴作準備:「真係可以用『聲夢』成真嚟形容,我已同屋企人講好11月要進行『地獄式』訓練,跑步練氣,戒食糖果、薯片等零食。呢一個月會謝絕與朋友聚會,仲要密集式練歌排舞,務求以最好狀態跟樂迷見面。」
Aska對於今次與Chantel合作相當期待,Aska指Chantel將操肌任務交咗畀佢:「我會盡力而為,我可以同Chantel合作開演唱會十分開心,大家《聲夢》之後都有唔同合作,不過今次一齊合力做個幾鐘嘅演唱會,大家都要兼顧好多,同時要分工合作,希望可以畀大家一啲驚喜。」
入行短短一年,Aska表示除咗唱歌,仲有機會拍劇,識咗一班圈中好友:「希望到時可以邀請『聲夢』同學,仲有『美麗戰場』嘅一班演員及導演來看我嘅演唱會。」