以前就話打牌睇到人品，不過而家個個都打機，唔少人一開Game就六親不認，唔知遲啲會唔會改為「打機先睇到人品」呢？呢日 Tyson Yoshi 同 劉沛蘅 齊齊現身一個電玩活動，Tyson Yoshi就講明唔鍾意同女友一齊打機，仲話隨時搞到出事鬧交呀。

要避免呢啲麻煩，男士就要學吓洪卓立喇，因為Hillary呢個100分女友話阿Ken打機夠晒勁，自己仲至鍾意睇住佢打機呀。

Tyson Yoshi為咗新歌MV可以話不惜功本，除咗自己執導務求完美之外，仲投入咗大量製作費，仲話MV故事有連貫性，大家慢慢睇埋其他歌就會明白當中嘅故事咁話呀。

參加《聲夢傳奇》入行嘅 林沚羿 小學時已經醉心音樂，經過比賽之後最近終於正式推出自己嘅首支單曲，呢日仲為新歌拍攝MV。Venus親自介紹呢首節奏輕快嘅新歌時，就話錄音都花咗唔少時間，仲加入咗唔少自己嘅諗法喺當中呀。

雖然MV當中有一架超跑，原本以為Venus會飛返轉，但係原來佢連車牌都冇，更加話自己如果揸車可能會其他人做成危險咁話，仲認為自己隨時會成為馬路炸彈，所以都係先擺埋一邊以後再算喇。