下流上車族｜獲女fans舉牌撐場 林敏驄預告結局周會仲洋蔥

台慶劇《下流上車族》開播以嚟，唔少觀眾都讚題材貼地又多感動位，網民仲睇好林敏驄、鮑姐鮑起靜同江美儀可以喺台慶頒獎禮可以斬穫唔場獎項。呢日一眾《下流上車族》嘅演員就去到商場宣傳，當講到網呢睇好佢哋會攞獎，美儀姐就話一切隨緣，有當然會開心，冇獎嘅話佢哋都會自己買個獎互相頒畀對方呀。而得到女fans在場舉燈牌支持嘅林敏驄，就話得到咁多觀眾支拎佢就已經當攞咗獎，而喺旁邊嘅鮑姐亦加把口，話而家唔少男觀眾睇阿驄做戲都會畀佢嘅演技感動到喊，不過阿驄就話而家嘅劇情未算最感動，佢仲劇透話嚟緊同美儀姐會有一場喊死觀眾冇命賠嘅戲，叫觀眾準備定紙巾呀！

羅毓儀喺劇入面同鮑姐有唔少對手戲，佢就話拍攝時有捉緊機會向對方偷師，講到嚟緊嘅結局周，羅毓儀就話佢有一場因為鮑姐而爆喊嘅戲份，仲話拍攝時令佢諗返起自己嘅親生婆婆呀！

觀眾關心嘅另一焦點，就係袁文傑飾演嘅丁生，到底可唔可以追到郭柏姸飾演嘅車芊芊，呢日丁生就賣關子唔講住，但就自爆劇中同阿驄場鬧交戲，啲對白原來係佢即場爆肚嘅！

而劇入面嘅「哈比人家族」鄧智堅、林穎彤同關曜儁果然係一家人，呢日雖然冇夾過，但佢哋嘅衣着都好似夾好晒咁，林穎彤話當初知鄧智堅做佢老爺，仲驚大家會唔接受，但估唔到劇集播出後網民咁鍾意佢哋呢個「哈比人家族」組合呀。