伍仲衡夥拍區永權蕭正楠搞音樂會 互窒互寸大放笑彈

伍仲衡夥拍區永權蕭正楠搞音樂會 互窒互寸大放笑彈

音樂人伍仲衡宣佈於2023年1月6號聯同蕭正楠及區永權假喺灣仔伊利沙伯體育館舉行《HEA TOGETHER LIVE 2023》音樂會,今日優先售票,門票分別為港幣$780、$580、$380, 11月18號城市電腦售票網公開發售。


區永權、伍仲衡及蕭正楠好似睡佛般側躺喺地上。

三子日前為演唱會拍攝海報大放笑彈,佢哋十分欣賞今次演唱會海報,影到好似時裝雜誌咁型,見佢哋三個睡佛般側躺喺地上,完全配合主題夠晒HEA,佢哋解釋「HEA」原因:「每次有組合出現嘅演唱會個名都好型,又會用英文名,諗來諗去都冇一個好型嘅英文名襯到我哋。結果,諗到Harry(伍仲衡)、Edwin(蕭正楠)和Albert(區永權)就變咗HEA嘞!」三子更不忘互窒。


區永權、伍仲衡及蕭正楠十分欣賞今次演唱會海報,影到好似時裝雜誌咁型。

《中年好聲音》評判伍仲衡更笑言畀紅燈蕭正楠,蕭正楠以歌手身份入行,回憶當初唱歌生涯就喺灣仔伊利沙伯體育館開始,蕭正楠於2001年參加唱歌比賽攞到冠軍,當佢唱陳奕迅《傷信》,蕭正楠表示當時有幾千人參賽,區永權提議蕭正楠演唱會再唱,作為《中年好聲音》評判嘅伍仲衡就笑言:「畀紅燈你!」區永權笑指伍仲衡係「殺手」。

《中年好聲音》評判伍仲衡更笑言畀紅燈蕭正楠。


伍仲衡認真表示當時係靠區永權而認識蕭正楠,「佢哋上過我studio玩過一次live,一拍即合,大家好多火花,一齊開live唱歌都好多人睇。」區永權笑問伍仲衡:「好多人都上過你live,但都冇一拍即合咩?係咪嗰啲人冇火花?其他上過你live歌手,完全睇唔上眼?」伍仲衡輕鬆接招:「因為嗰啲太貴,你哋就講心唔講金!」

伍仲衡當時係靠區永權而認識蕭正楠。


區永權即回招笑:「嘩!你個賤人呀!哈哈!我知今次酬勞近乎零,原來畀你啲咁嘅人吸晒。」為咗今次演唱會,伍仲衡自爆創作一首好好玩嘅3人合唱歌,區永權乘機催對方交歌。

今年係蕭正楠出道20年,佢開心有一個自己音樂會。


今年係蕭正楠出道20年,佢開心有一個自己音樂會,同歌迷可以有一個好好交代,區永權讓對方索性將呢個演唱會叫《2023蕭正楠演唱會》,區永權擔任和音,伍仲衡負責彈琴,蕭正楠與區永權為咗今次演唱會笑言要一齊增肥,指住伍仲衡肚腩:「大家明啦!咁樣balance啲吖嘛。」伍仲衡即回應:「你(指蕭正楠)千祈唔好呀,增肥唔係個個都好睇。你增肥之後,應該冇晒劇拍,要肥但都要有人鍾意,係功夫嚟,需要培訓至做到,呢啲叫大隻。」

古淖文獲評判一致畀滿分封冠軍 譚輝智屈到病舞姿成亮點

歌唱選秀節目《中年好聲音2》24號舉行「登峰之戰」總決賽,古淖文憑住佢拿手嘅英文歌《Feeling Good》,獲得所有評判一致畀出20分,以總分99分成為冠軍。古淖文話賽果完全出乎意料,當見到所有評判畀出20分時,嗰種心情真係好震撼。

而屈居亞軍嘅譚輝智唔止無失落,仲大讚古淖文係「值嘅」,而佢自己喺快歌環節嗰首《屈到病》就成為全晚最多人討論嘅亮點,唔擅長跳舞嘅譚輝智,話自己嘅舞姿一定唔會型,所以佢就決定以搞笑風格上場,尹新杰仲以「好得意」嚟形容佢嘅舞步呀!

一直被視為大熱嘅顏米羔,雖然最後成為季軍,但佢都話自己已經心滿意足喇,事關佢話覺得名次對佢嚟講唔重要,最重要係可以爭取機會唱歌。而黃劍文就以些少差距未能晉身三甲,不過對於好朋友台灣歌手張芸京特登飛嚟香港撐場,劍文就覺得好感動,仲話芸京喺音樂呢條路上一直鼓勵自己,兩人仲感動到互相抱抱呀。

至於安雅希、沈宗賢同埋陳俞霏就話行到決賽呢一步,已經心滿意足,幾位仲話經歷長達八個月嘅賽事,終於告一段落,佢哋嘅心情既放鬆又唔捨得。

評審之一嘅伍仲衡,一向比分都好手緊,但決賽夜佢竟然將自己第一個20分比咗古淖文,肥媽都好認同,話古淖文絕對係無可挑剔嘅演出。

決賽夜《中聲》嘅師兄師姐都有嚟觀戰,周吉佩、李佳同羅啟豪都大讚參賽者演出超水準,顏志恒仲話對譚輝智跳嘅《屈到病》非常深刻,劉威煌就講笑話遲啲可能變成廣場舞。對於蔡琴以嘉賓身份現身,就令大家相當驚喜,佢仲獻唱咗經典歌《你的眼神》令樂迷大飽耳福。

決賽夜結束後,一眾粉絲喺電視城門外等候偶像,米羔、輝智仲有劍文更親自出嚟答謝歌迷嘅支持。

 相關推薦

熱門搜尋