蘇民峰壓力爆煲患怪病全身毛孔出血 《CP訓練營》學員亂入搵師傅指點愛情迷津

蘇民峰夥拍陳若思（Amber）、倪嘉雯（Carmen）、陳國麟（Doniven）同黃嘉雯（Carmaney）主持J2節目《呢鋪開乜︰開壇》今日播出，解答風水命理疑難，今集《CP訓練營》兩位學員馮建晞（Argus）同蔡浩洋（阿洋）擔任嘉賓，請教師傅愛情及事業運。

今集主題講「壓力」，原來蘇民峰喺2003年沙士之後，因為壓力患上怪病，佢嘅壓力唔係冇生意，反而因為生意太好忙到癲，搞到全身毛孔出血，蘇民峰解釋：「2003年沙士之後嘅2004年，好多人買樓搵我睇風水，仲話我一日未睇一日都唔郁裝修，隨時丟空成個月，你話幾大壓力。」

蘇民峰當時由早上11點半睇到晚上11點半，每日12個鐘工作，壓力大到病，試過半夜胃痛去急症，又搵唔到病源，每次飲香檳個胃就覺得好酸，頭皮、毛孔出血，睇極醫生都唔好，去到2005年蘇師傅開始減產，所有預約要等11個月，每月一次外遊旅行，怪病不藥而癒，師傅話︰「而家搵我做嘢要下午2點後。」

每人壓力源頭唔同，Carmen最驚早起嘅拍攝通告，緊張到瞓唔到、Doniven未知幾時有拖拍，漸漸變成壓力，師傅話睇印堂、眉心同法令紋，可以睇出一個人係樂觀定係悲觀性格，抗壓能力都唔同，師傅又教Amber同Carmen識男仔可以識嘴角同眼角向上嘅男仔，師傅又用Amber做例子，指佢印堂飽滿「有阿Q精神，跌落地又會揦返拃沙」，屬於自得其樂較睇得開嘅人，Amber接受訪問時都話︰「對於小事情係好容易開心、又好容易生氣。遇到大事情就抱樂觀嘅態度，天跌落嚟都當被冚個種。」

另外《CP訓練營》講4對男女生配對拍拖嘅真人騷，周一至五晚10點半喺J2（82台）熱播。其中兩位學員Argus同阿洋上節目做嘉賓，佢哋把握機會搵師傅指點迷津，問起二人出生八字，發現佢哋不約而同都係壬寅日出生，同今年壬寅年正好相沖，60年一遇，會係人生情緒最波動一年，到底有咩係刑剋要留意？師傅又批二人今年桃花運，佢哋會唔會喺《CP訓練營》搵到另一半，記得留意兩大節目！

《呢鋪開乜︰開壇》逢星期四晚上9點半J2（ 82台）播出