林海峰蘇玉華《正義迴廊》累積票房破千萬 翁子光率台前幕後密謀搞慶功賀佳績

電影《正義迴廊》上映第13日，累積票房衝破首個1000萬後，導演何爵天感謝廣大觀眾支持：「《正義迴廊》係我首部長片，得到監製翁子光嘅信任，咁多位實力派演員傾力演出，台前幕後一齊努力，真係非常非常感謝各位支持！ 作為一套三級電影，可以得到呢個成績，係非常難得，所以非常感謝各界觀眾嘅支持。嚟緊嘅日子會繼續同演員到各區戲院做分享，希望到時會見到大家！」

 首次擔任監製嘅金像導演翁子光，喺社交平台以千字文分享對《正義迴廊》累積千萬票房感受，經已超越翁導得獎作品《踏血尋梅》總票房：「電影開畫票房廿幾萬，我倒抽一口涼氣，同自己講『三級片係咁㗎啦！』默默地要脅導演『喂大佬你搏命去謝吓票，收得幾多得幾多，觀眾支持我哋都要感恩。』到咗第2周，電影票房上升，已經四日成為單日票房冠軍，剛過去周末周日票房超過130萬，大佬呢個係荷里活大片嘅票房數字，我們靠口碑打咗一場逆轉勝仗，周六晚我睇到票房數字，默默坐喺我家中嘅碌架床流下眼淚，老懷安慰。」

對於票房破千萬，翁導表示：「不敢妄想2000萬或者更多，感恩好多喜歡呢套電影嘅觀眾，有啲甚至睇咗幾次，實在好大嘅恩情！能喚起大家愛看港片嘅熱情，導演跟我一樣都好開心！當然我也會繼續逼使導演繼續拉著演員一起謝票，喺電影院親近一下各位觀眾，其實是我們比觀眾更加幸福。」戲中演員紛紛表示既開心又興奮，楊偉倫覺得好振奮，麥沛東則多謝大家嘅肯定，蘇玉華表示感動、感恩、感激每一位入場支持「正義迴廊」嘅觀眾，令佢哋相信呢個世界真係有奇蹟，而林海峰以四字回應：「正義迴響！」

葉蘊儀對於票房衝過千萬當然非常開心：「期待更多嘅千萬來臨，香港好電影加油！最後多謝所有入場的朋友及大家的口碑推介。」蝦頭楊詩敏笑稱好似攞咗「最佳整體演出獎」咁，希望票房繼續上。
電影《正義迴廊》由翁子光監製、何爵天首次執導，一眾演員包括楊偉倫、麥沛東、蘇玉華、周文健、林海峰、葉蘊儀、朱栢謙、邵仲衡、鄒凱光、區嘉雯、何啟南等組成之龐大演員陣容，故事靈感源自 2013年的大角咀雙屍奇案， 導演何爵天挑戰高難度， 影片涉及法庭對峙、奇案重組與陪審團之間嘅角力。