波姐馮素波縱橫影視圈超過七十年，波姐之前邀請咗歐陽震華、郭晉安及劉美娟登場，波姐今次搵嚟兩套台慶劇孭重飛嘅視帝大熱人馬嘅陳山聰上電台節目《樂齡王國》受訪。

陳山聰與波姐首次碰頭喺2010年拍《掌上明珠》。
波姐認識陳山聰，始於對方多年前初入行做歌手，陳山聰開始嘗試拍劇先有機會合作，首次碰頭喺2010年拍《掌上明珠》，以及近日熱播台慶劇《超能使者》等。
波姐喺《掌上明珠》演陶大宇媽咪「陳君如」，而陳山聰飾演「周旭仔」係陶大宇劇中好友。

陳山聰透露前年拍《超能使者》時，適逢兒子陳霆軒(Jaco)出生，成為新手爸爸，經常向波姐請教「育兒經」，佢開心地講：「真係冇諗過自己有一日會成為爸爸，BB出世前，我比Apple(太太何麗萍)更有『產前抑鬱』，經常無故擔心好多，無數個晚上都會失眠，尤其當時因疫情無法上育兒課程。」後來Jaco出生後，陳山聰發覺自己頗有湊仔及當爸爸嘅天份：「我只係用咗一個多月就學識餵奶、哄BB瞓，換尿片等，仲喺Jaco出生後3個月，我就可以獨自一人照顧佢，呢個好有滿足感。」
陳山聰2019年迎娶圈外女友，其後誕下一子陳霆軒（Jaco）。

陳山聰喺節目上分享自己係一個「唔停得嘅人」，自從迷上跑步後，陳山聰習慣每天行程安排得密密麻麻，亦因此遭太太Apple斥責，指佢嘅生活過於勞碌，陳山聰笑言：「老婆成日話我：『你可唔可以停一陣，停下啦你！其實你真係唔需要咁辛苦！』」
陳山聰近年成為TVB最矚目的上位男主角之一。

陳山聰目前對自己嘅演藝事業非常享受，尤其今年係大豐收嘅一年，從未試過喺一年內播出6套劇集，繼2019年《金宵大廈》後，感到好幸運嘅一年。明年就係佢入行30周年，但陳山聰認為自己演藝事業而家先算係真正開始，現時有更多人留意到佢，逐漸得到認同，最後陳山聰認為演技尚有進步空間，希望將來有機會可以飾演更多唔同類型角色讓觀眾欣賞，讓觀眾看得開心。

陳山聰喺台慶劇《美麗戰場》飾演一言Sir，被阿寶設局陷害而當眾失禁，獲網民大讚演技大爆發，未知能否為他奪下今屆視帝呢？

陳山聰2019年主演《金宵大廈》被網民封為「神劇」，陳山聰同李施嬅獲得一致好評。陳山聰喺今年台慶劇《超能使者》演身手不凡、憨直義氣嘅高勇，苦練「膠勇話」，讓觀眾看到不一樣的陳山聰。波姐與陳山聰喺近日熱播台慶劇《超能使者》亦有同場演出。

劉佩玥、陳山聰、劉穎鏇、張振朗、郭柏妍、丁子朗及監製文偉鴻出席新劇《奪命提示》煞科宴，眾人分享拍攝由寒冬到炎夏難忘經歷，監製逐一點評演員表現。