無綫55周年經典角色漫畫牆出自Terry手筆 捱幾晚通宵鑽研人物神髓

迎接TVB55周年台慶,早前TVB舉行節目巡禮儀式有兩幅超巨型嘅「TVB 經典人物漫畫牆」,特別設計55個無綫經典角色及綜藝主持人物嘅卡通漫畫,畀藝員同客戶即場打卡留念,漫畫牆係由《愛回家之開心速遞》演Terry嘅李偉健主理。

李偉健呢日同大家分享製作過程,原來之前佢收到消息,得知公司想設計「人物角色牆」,佢提議不如將人物變成漫畫,後來聯絡到製作單位嘅監製,李偉健花咗幾晚通宵,鑽研人物嘅神髓,練習咗好多次先完成到漫畫草圖,多得製作單位幫忙搵到美術組嘅高手們一齊製作。

李偉健印象深刻角色係「丁蟹」鄭少秋、「丁力」呂良偉同「許文強」發哥,佢笑言喺《愛‧回家》嘅「揸流灘」經常演「丁刀」,佢指秋官當年飾演丁蟹呢個角色太好,李偉健覺得最難畫就係女士:「因為電視台好多女仔都好靚,而我畫啲嘢唔係咁靚,畫靚嘢就難,唔係話畫男仔唔靚,只係男仔輪廓鮮明啲,譬如『丁蟹』秋官啲表情比較突出,覺得易畫啲,『丁刀』有刀疤再貼鬍鬚、再加眼大大,就會易畫啲,女仔個個都好靚,要搵特徵就比較難。」

 相關推薦