法證先鋒V｜蔡思貝長髮Look驚艷出場 王敏奕衝動如蠻牛洪永城見拉麵就驚

一連30集嘅台慶劇《法證先鋒V》，聽晚起就會同大家見面，新一輯除咗有「滅罪鐵三角」組合：「法證部」、「法醫科」同「重案組」；集合「三生三旦」黃宗澤、袁偉豪、洪永城、蔡思貝、蔡潔同王敏奕嘅主角陣容之外，以懸疑手法拍攝嘅單元案件亦係重點所在。

《法證V》一共有14個單元故事，包括「安老院虐殺案」，「離奇風水樹」、「失眠拼圖」、「劇本殺」同「天國與地獄」等構成；其中打頭陣嘅重頭故事係「天使不美麗」，由 連詩雅同人氣小花 區明妙 擔任主角，兩集劇情刺激緊湊，未到最後一刻都難分邊個係「受害者」，邊個又係「加害者」，真相將由「滅罪鐵三角」嘅精密調查以洋蔥式逐步揭開，從而帶出人性光輝同陰暗面。

幾位男主角都大讚劇中單元故事編排細密，而曾喺宣傳活動中笑指自己劇中主力同袁偉豪「談情」嘅 蔡思貝 ，佢扮演嘅角色 譚倩雯 造型亦都曝光，一向多以清爽短髮示人嘅佢，分別有多個唔同打扮，有打鼓、記者、眼鏡娘、噴泉辮同長髮公關Look，其中長髮造型更贏我外界好評。

事先張揚為角色專誠學打鼓嘅Sisley，喺日前曝光嘅劇集製作特輯中展現學習成果，入型入格之餘亦相當有型。思貝受訪時就強調為咗學好打鼓，花咗唔少心機喇：「由完全手腳唔協調，到第一次練到隻手有水泡，好難忘。」佢又透露正式拍攝當日， 袁偉豪同監製都稱讚自己表現，佢話：「阿Ben 有玩開音樂，佢同監製都有話：『打得幾好吖』，咁我就好似小朋友做咗樣嘢畀人讚咁。」 

而笑稱由中學開始已係《法證》忠實Fans嘅 王敏奕 ，喺劇中會飾演初出矛蘆熱血女警霍寶英， Venus受訪時就話角色嘅直覺型性格，同「滅罪鐵三角」聯合查案時，會有非常微妙嘅化學作用，佢話：「我個角色好有熱誠同正義感，好希望用自己嘅衝勁去破案，同埋當大家都好理性時， 佢就會用感覺行先，但有時又會畀到啲唔同嘅角度大家。可能呢個角色想帶出嚟嘅信息， 就係有時你都要相信你嘅直覺。」

Venus又透露劇中嘅連環殺手熟悉唔少科學知識，令查案難度大大提升。至於角色含冤入獄嘅秦克男 洪永城 ，就笑指自己角色特別之處係「衰八卦」： 「因為好多Case本來唔關佢事，但因為佢要救人，就得罪好多唔同嘅人，然後捲入唔同兇殺案當中。」至於最難忘場面，Tony就笑言係食拉麵查案，仲搞笑話：「劇情講我哋去唔同嘅地方食拉麵，從而去搵出真兇......總之就食到大家都好～滿～足，而且想話劇組準備嘅拉麵都幾好味。」

《法證先鋒V》11月14號起 星期一至五 20:30 翡翠台