出道短短半年嘅 雲浩影 (Cloud)，近日推出第四首派台作品《氣流》，MV亦已經同彥推出。Cloud揚言新歌係到目前為止自己嘅最愛之作，今次佢由創作到製作仲全程參與，更加投放大量個人感情，根據自己喜好度身訂造新歌。佢仲話拍MV「玩大咗」，因為雖然加入強烈個人風格，不過全程衣衫單薄之下要抱住巨型冰塊拍攝，就搞到佢凍到腳震喇。

Cloud新歌MV要與巨形冰塊演戲 
因為自己喜愛坍冬季感覺，所以Cloud一直希望擁有感覺非常冬季嘅情歌，而新歌《氣流》完全係自己口味，令佢夢想成真。自五月推出第一首派台歌《願望之翼》，到呢次第四首歌啱啱半年，Cloud越嚟越了解自己嘅音樂路向，佢話：「我超鍾意今次新歌《氣流》，呢首歌絕對係我平時聽歌嘅類型，經歷咗之前三首歌，今次整咗一首好喜歡好特別嘅歌，好期待。」
 
佢又話：「我覺得呢首歌講一段義無反顧嘅愛情，有啲傷心，係淡淡嘅悲傷、苦澀。冬天，就係要有少少苦澀嘅元素。」MV由Cloud演獨腳戲，主要對手是一塊巨型冰塊，每一舊冰都封存咗一啲定情物品，好似鮮花、毛公仔、戒指同情信等。

Cloud正式出道半年就推出第4首歌 
因為以真冰塊拍攝，期間又一直在溶化，Cloud抱住冰拍攝演出亦要爭取時間，而工作人員又要小心保護未拍攝嘅冰塊，總之台前幕後都爭分奪秒，非常刺激。至於穿著短裙嘅Cloud就凍到震喇，佢話：「最初聽到個idea時，幻想到畫面好靚、好正，嚟到拍攝現場親眼見到啲一舊舊巨型嘅冰塊，有我半個人咁高，仲要不停溶雪，心諗『玩大咗添』！不過要多謝導演同美術設計師令呢件事成真，好期待拍出嚟效果，一定好靚、好好睇。」
 
MV攝影師又以「男友視角」拍攝表達甜蜜感覺，Cloud要對鏡頭談情，仲透露私底下極少講肉麻情話，佢笑言：「好唔慣對鏡頭做呢啲嘢，有啲噁心，毛管戙！」雖然係情歌，但係今次MV就缺少男主角，Cloud就話唔係怕男友呷醋，而係導演想觀眾集中望住自己咁話呀。

鄭欣宜 推出今年第一首派台歌《仍會等》，MV由三個有關「寂寞」嘅故事組成，其中 柯煒林 經歷與另一半 莫竣名 嘅生離死別、而身處挪威嘅少女 余淑培 就獨自面對陌生新生活，加上欣宜完成工作後回家，一個人透過窗外觀察別人生活思考人生。欣宜拍攝時仲輕易按導演要求兩度落淚。

欣宜拍攝新歌MV，兩度應導演要求當場淚灑
欣宜話對新歌《仍會等》可謂「一見鍾情」，佢話： 「新歌由 謝芊彤 作曲同填詞，我非常之非常之喜愛，我嚟緊嘅新專輯入面，最能夠代表到內心深處嘅狀態。當我收到呢首歌嘅曲同詞嘅時候，就第一時間用手機錄片，好想分享我有幾咁喜愛呢首歌。」

欣宜又話有時時會獨坐喺屋企窗前，留意別人生活同思考人生，佢話：「我好鍾意喺屋企嘅窗望向其他單位，有時會見到一對情侶睇電視、小朋友做功課、媽媽喺廚房洗碗。鍾意睇其他人嘅生活，然後會諗佢哋會諗咩？每次聽到呢首歌，我都會有一種感覺，完成一日工作一個人喺屋企返到最簡單、最原本嘅自己嘅時候，我會諗啲咩？擔心啲咩？不過無論如何，到最後就算有擔心和憂慮，鄭欣宜都係樂觀同有希望嘅！所以呢首歌對我好重要。」