TVB直播遊戲節目《唔玩唔知有獎攞》由陸浩明（6號）、吳若希和林正峰擔任主持，連續5日要求不同嘉賓玩遊戲，同時家庭觀眾可以參與競猜比拼結果， 一齊瓜分豐富獎品，首集邀請黃翠如、陳自瑤（Yoyo）和連詩雅（Shiga）三位好姊妹上陣。

6號指首日已送出一千份獎品，林正峰稱絕大部份禮物係送畀家庭觀眾，吳若希覺得今次呢個節目可以睇到嘉賓即興反應，佢哋開心有機會做台慶前奏節目，感到好光榮。

黃翠如、陳自瑤及連詩雅一向老友鬼鬼，佢哋冇諗過原來要對決，笑指喺節目當中可睇到佢哋嘅不和，黃翠如稱若果勝出有機會喺台慶當日爭奪50萬，佢哋三個要造就其中一個去爭入決賽，然後平分獎金。

呢日連詩雅未婚夫陳家樂親自到場打氣，連詩雅成為贏家，被委派台慶爭大獎，佢同兩位好友都樂在其中，陳自瑤讚遊戲好有新鮮感，之後未玩過。

新婚一個月嘅連詩雅，呢日獲邀參加頒獎禮。由於婚後同老公陳家樂各有各忙，所以蜜月之旅Shiga就話未定到幾時去，仲話有機會係去個三日兩夜嘅短暫旅行就算呀。提到身邊唔少朋友都已經生咗小朋友，Shiga笑言都聽咗唔少「有用資訊」，不過自己就唔太急切，所以一切都係順其自然呀。

對於早前曾透露會同好姐妹黃翠如同陳自瑤一齊拍攝旅遊節目，Shiga呢日就指仲有好多嘢未落實，但自己就好期待，希望可以快啲成事呀！雖然同好姐妹嘅旅行節目未知幾時開拍，但Shiga就透露嚟緊會去馬來西亞工作，屆時仲會舉行fans見面會呀。

同場嘅鍾雨璇就自爆早前畀師傅批家庭運一般，佢話最近家宅真係有啲不靈，除咗自己同媽媽早前不幸確診外，媽媽仲畀診斷出有血管性水腫，而佢嘅愛貓亦有不適，自己又喺活動上不慎扭傷腳，可以話相當黑仔呀！