王菀之聯乘Serrini首次開騷由朝玩到晚 盼歌迷化身精靈造型入場

兩大才女Ivana(王菀之) 及 Serrini 將喺12月2至4號於灣仔會展舉行《Fairy Nice To Meet You Live 2022》，「藝術精靈」Ivana 加「真美精靈」Serrini，開騷早前只出一張海報，三場已秒速爆滿，個個爭住想入Fairyland！

由於買唔到飛嘅fans不停要求加場，最終兩位精靈早前宣佈最後進入Fairyland機會，加開第四場日場，令歌迷十分開心，Ivana同 Serrini今次加開第四場，同大家由日頭玩到夜晚，加開12月4號下午3點場，仲未撲到飛fans要好好珍惜，由於政府再次放寬防疫規例，由於只可以相連8個座位，而家變咗12人一齊坐，大會再把座位表重新砌過，觀眾相約更多朋友一齊開心睇騷。

是次主辦單位用咗7位數字打造Fairyland「M」字形舞台，據知今次係會展第一次出現M形舞台設計，觀眾入場後，必定感受到「藝術精靈」同「真美精靈」嘅誠意，佢哋寧可犧牲入場觀眾數量，都要為觀眾帶來極佳嘅視覺效果，Serrini表示：「我第一次見台圖，個舞台好壯觀，係咪會展第一次有這樣大的舞台，我就唔知，不過應該幾震憾，自己都好期待真實上台嗰日會幾興奮。」

既然今次係 Fairy Nice To Meet You，又臨近聖誕開心日子，所以兩位精靈同步想同歌迷一齊提早過聖誕，Ivana希望觀眾一齊玩 DRESS CODE扮精靈入場，又或者有聖誕感覺嘅造型。
Ivana今次同Serrini在演唱會上，將著上超級特別嘅造型，化身好多唔同嘅精靈，充滿藝術感，Ivana笑言只希望到時着得落啲衫，Ivana同Serrini今次首度合作，推出演唱會主題曲《 誅神的黃昏 》，由Ivana作曲，黃偉文填詞 ，新歌已於各大平台上架，並廣受好評，所以兩人非常開心。