TVB 55周年台慶劇《超能使者》噚晚可謂高潮迭起,劇集上半段阿鏈(陳展鵬飾)與妻子淑敏(劉佩玥飾)仲喺度拉拉扯扯,淑敏與阿鏈弟弟孝添(黃庭鋒飾)更因物業問題爆發激烈衝突,豈料下半段劇情即驚現兩大轉折位!
首先係到阿鏈屋企黐餐嘅Q姨(唐詩詠飾),驚見對方家中空無一人兼阿鏈與「空氣」對話,之後Q姨再查出阿鏈弟弟孝添原來早因挪用公款成為階下囚,兩大驚人發現均令之前劇情變得「撲朔迷離」,對此不少網民推測阿鏈有精神病,更有人估計「黑化」淑敏以超能力令阿鏈產生幻覺。
噚日官方喺社交網上載預告片,驚見阿鏈危站天台對Q姨說:「我知你好有義氣,但我唔想連累你,我閃到同你一齊喺呢度跌落去呀……」劇情發展更引人入勝。
噚晚另一值得推介高潮位係淑敏與前度Stanley(郭子豪飾)喺街頭親熱遭阿鏈撞破,惱羞成怒嘅淑敏竟然向阿鏈發爛渣瘋狂投訴,怪責奶奶(程可為飾)長期逼佢食藥生仔之餘,又痛斥老公收入少,仍堅持幫細佬還債,淑敏邊講邊喊:「我出到去畀啲Friend笑,你有冇諗過我感受呀?!我對住你哋成家真係好辛苦、好大壓力,我真係頂唔順喇!」
淑敏更遭阿鏈踢爆曾墮胎,雖然二人一度鬧得很僵,但淑敏最終還是經不起阿鏈一再懇求,暫時擱置離婚念頭,不少網民睇完大讚阿Moon越來越有戲味,對於網民正評,阿Moon笑言:「聽到大家鍾意我都好開心 ,我會繼續努力。」
問到要由「模範太太」突變成「陰謀人妻」係唔係好考演技,阿Moon稱要壓抑感覺去演:「因為唔想做到慘情戲咁,所以一路要壓抑住自己嘅感覺去演,直到最後先大爆發宣洩不滿。其實攤牌一幕Jazz都好緊張,好彩有佢同導演,仲有展鵬、郭子豪兩位好對手,加上所有嘢配合得好好,令我好相信角色嘅遭遇而真心地投入咗。」
對於被指係Final Boss,阿Moon大賣關子謂:「好多人問我係咪喺幕後操控阿鏈,我只可以講淑敏唔淨係一個妻子,仲會影響阿鏈將來嘅發展。」阿Moon續指阿鏈夫婦嘅驚天大秘密將於今晚終極揭盅,並笑言終可鬆一口氣:「啲人瘋狂問我角色身世,但我把口好密,連爹哋媽咪都冇講,終於好快唔使守秘密喇!」
無綫55周年台慶劇《超能使者》逢周一至周五晚9點半翡翠台播映