每集以唔同主題推介健康美食嘅節目《健康必殺食》，13號晚播出嘅第四集，就以「春天食物」為主題，兩位主持陸浩明、Leonard鄭衍峰聯同嘉賓主持江嘉敏、邵初及黃頌明，齊齊搵飲食良方幫觀眾健脾去濕。
江嘉敏作狀要打6號。
當江嘉敏解釋生薏米最適合煮成去濕消腫嘅薏米水時，6號就笑江嘉敏係消腫KOL，仲叫佢你要食多啲：「平時你陰...氣，呀唔係，係濕氣重，所以食呢款薏米最好！」搞到江嘉敏話想出手掌嘴6號合嘴。而到邵初介紹淮山料理時，6號又無厘頭問：「你知唔知奶奶最想新抱食咩料理？」江嘉敏聽完認真咁問係咩？點知6號就爆出爛Gag話係「懷孕料理」，搞爛gag搞上癮嘅6號，聽到邵初問Oreo湛錦鈿點解啲韓式粉絲會特別長？6號又搭嗲話因為啲粉絲喺韓國嚟，路程遠所以長好多，令到江嘉敏同邵初都哭笑不得。
型男大廚Oreo湛錦鈿為大家炮製美食。介紹「黑之食物」。美棋以特別方式出場。
Leonard做咩要矇眼？
而第五集主題係介紹可以抗衰老同提升免疫力嘅「黑色食物」，專誠以黑色打扮現身嘅嘉賓主持林秀怡同林鈺洧chok住出場，睇落係威係勢，但當佢哋要伸手入製作組安排嘅黑箱估食材時，即時儀態盡失，林秀怡嚇到大叫好核突，而林鈺洧就嚇到花容失色兼喝止Leonard「捉手仔」至於染咗一頭紫髮嘅嘉賓黃美棋，就以極特別嘅方式出場，想知係點就要到時留意收睇喇！
Leonard帶佳嘉賓主持陳嘉慧、吳紫韻、鞏姿希去歎黑松露滑蛋花膠多士。
之前介紹過食物界嘅男士恩物，嚟到第六集當然都要照顧一下女士們啦！呢集以「女人食物」為主題，由Leonard帶佳嘉賓主持陳嘉慧、吳紫韻、鞏姿希去歎黑松露滑蛋花膠多士，之後再由6號帶吳紫韻、鞏姿希同邵初落田，採摘大廚Hilda陳曉樺需要嘅食材，嚟炮製木瓜雜莓燕麥芭菲杯同紅菜頭拿破侖。其間 6 號叮囑邵初一定要摘到蕃茄：「最緊要係啲茄紅素對男士有用」，邵初即取 笑 6號：「咁又係，你咁虧，要整多啲畀你啦」，6 號即發揮自己嘅轉數話：「你又知我 Quite(同音:虧) good 呀？」

《健康必殺食》逢星期一至三 22:30 翡翠台