法證先鋒V|傅嘉莉首演人妻媽媽 壓抑喊戲演技精進

法證先鋒V|傅嘉莉首演人妻媽媽 壓抑喊戲演技精進

「法證鐵三角」繼續同時著手處理兩大案件,包括闊太Michelle死亡事件,同秦克男  洪永城 飾翻案事件,最終克男前度陸詩詩 黎寬怡 飾證實遭Yoyo 傅嘉莉  飾設局毒害身亡,並偽造成自殺令克男含冤入獄。

昨晚曲折位係全程表現內斂嘅Ivan 馬貫東 飾中途殺出自認兇手,兼且證據確鑿,但Dr. Fan 蔡潔 飾)因種種蛛絲馬跡認定Yoyo先係真兇,仲多番勸喻Yoyo自首,Yoyo最終良心發現。至於捲入Michelle死亡事件嘅疑犯—PR公司老闆建邦 陳少邦 飾雖然被捕,不過因為佢一直高呼冤枉,井Sir 袁偉豪 飾對案件難以釋懷,似仍有後續發展,令觀眾大感期待。

其實18號播出一集可以話係Kelly嘅個人表演,佢嘅角色暗藏不可告人嘅殺人秘密,仲令深愛嘅丈夫走上頂罪歪路,Kelly唔止要演繹出壓抑同內疚感,亦要應付四場喊戲,徐徐落下嘅眼淚仍甚有感染力,獲觀眾大讚演技有進步。

Kelly亦對有份演出心中嘅經典劇坦言開心又過足戲癮,仲話拍攝時全程心情沉重:「我拍嗰時係聖誕前夕,每日開工都好沉重, 拍完嗰日係平安夜,我覺得終於可以釋放自己嘅情緒。」

至於劇中唔同程度嘅喊戲,Kelly同監製商量之後,因有感角色係專業人士,屬於唔會輕易爆發同失控,所以選擇較壓抑嘅演繹方法:「所以睇到老公封信先至爆發,嗰日場戲我記得係一 Take過,但我拍完喺現場喊到收唔到聲。因為我投入咗個角色,因為當年年少輕狂,搞到老公要為咗自己頂罪,嗰Take我喊到好辛苦。」

Kelly又話由於從未演過有老公同小朋友嘅角色,所以覺得非常難忘,亦加了唔少自身投射同想像喺角色中,仲話要感謝監製給予很大自由度同好拍檔馬貫東呀:「好開心同馬貫東繼《刑偵日記》 後再演一對,所以大家好有默契,對住佢亦多咗啲回憶,所以令我更加痛心。」

雖然案情緊張又緊湊,不過鏡頭後一眾演員相處其實輕鬆愉快,而「氣氛小公主」非 王敏奕 莫屬。劇中同黃宗澤有感情線嘅Venus,經常拍住對方查案,日前公開嘅兩條花絮片中, Venus全程遴遴迍迍,唔止整草莓大福時手勢揦西,又經常扮鬼臉撒嬌,令Bosco啼笑皆非。而另一Pair感情線 蔡潔 同 洪永城 日前拍攝吊威吔戲時,事先張揚有「威也恐懼」嘅蔡潔亦狂做鬼臉減壓,相當佻皮。

星光路上丨王敏奕自認吟噚爆老公嘈交好識閃 曾國祥讚《婚後事》 情慾戲拍得好

王敏奕喺TVB話題劇《婚後事》飾演介入陳子瑤與羅子溢婚姻嘅「終極誘惑」」Mira,表現亮眼,一改昔日純情形象,呢日王敏奕接受TVB娛樂新聞台節目《星光路上》訪問,與主播潘盈慧談及最初拍TVB劇係因為被李麗珍睇中!

王敏奕一開始拍廣告及做茄哩啡,然後佢又試吓電影casting,直至有機會參加海選,王敏奕去TVB面試,當時被李麗珍選中,兩日後獲通知飾演《女人俱樂部》後生版朱莉,王敏奕得個幾月準備練舞同拉筋,直言拉筋拉到喊,佢因呢套劇與陳瀅、糖妹成為好姊妹,至今相識11年,三人依然感情要好。

王敏奕印象最深刻係拍《婚後事》有句「你愛唔愛我」,佢認為呢句說話係每個女仔都會問,每個女仔都知背後嘅底蘊,然而會去問,王敏奕當時好想嗰場戲令觀眾有窒息感;已婚嘅王敏奕坦言愛情觀跟角色「Mira」有啲似,好享受拍拖同付出,王敏奕笑指自己為人較務實,唔鍾意勉強,亦唔想死纏爛打。

而王敏奕與老公曾國祥現實中冇乜嘈過交,二人遇到任何問題,王敏奕自認吟噚,最重要諗點解發生呢件事,相反老公曾國祥好識閃,佢笑言有時老公閃多兩吓,自己就冇癮唔傾,認同生活係需要磨合,冇咩需要將小事化大,講到《婚後事》有好多情慾場口,王敏奕指老公有睇過啲片,有讚該劇拍得幾好,感覺同平時TVB劇唔一樣,對於老婆演出獲讚,曾國祥有睇到新聞亦好戥老婆開心。

 相關推薦

熱門搜尋