疫情持續良久,莫講話餓旅行餓足幾年,就連唔少國際巨星嘅演唱會都因而取消或者無限次延期。久等三年之後,終於再有韓國組合來港開騷,SUPER JUNIOR日前再次訪港,19號晚喺亞洲國際博覽館舉行一連兩場《SUPER JUNIOR WORLD TOUR – SUPER SHOW 9 : ROAD IN HONG KONG》。
近年都係靠韓綜見到嘅SJ成員,喺現場歌迷震耳歡呼之下,Leeteuk利特,Yesung藝聲,Shindong神童,Donghae李東海, Eunhyuk銀赫,Siwon崔始源,Kyuhyun圭賢同Ryeowook金厲旭,先以《Burn the Floor 》一曲展開序幕表演用歌聲震爆場館,又大玩手燈舞。
緊接嘅《The Crown》、《Super》、《Mr.Simple》、《Ticky Tocky》、《Paradox》、《Mystery》等歌曲, 又跳又唱近七首歌Medley,全場歌迷亦以手燈配合音樂節拍應援打氣,以熱烈歡呼聲迎接一首又一首勁歌熱舞,Fans們又不時全場大合唱,更同SJ一齊載歌載舞,場面熱烈。
神童之後又用廣東話同現場歌迷打招呼:「您好大家好」,「弟弟、哥哥、妹妹、姐姐,我是神童!」之後又話,「好耐好耐先再嚟到香港,大家真係非常之熱烈,希望直至到最後一刻大家都enjoy,大家識聽韓文?我愛你呀!」
之後東海接棒,出口術大讚歌迷靚女 : 「真係事隔好耐見大家,大家近來好嗎?大家更加靚女咗喎,係咪近排戀愛緊呀?我真係好掛住大家,噚日隔離嘅時間,我搵返以前喺香港舉辦嘅Super Show,今日我都預計大家比我嘅愛都會係咁(熱烈),好期待大家俾多啲愛我,我準備咗啲禮物!」然後大力送上飛吻,令歌迷興奮尖叫。
而勵旭就問歌迷,「我想比大家睇到我剪咗頭髮靚唔靚仔啊?我靚唔靚啫?」現場歌迷即大叫「靚!」崔始源則話 :「我好想好想你們」「大家好我係崔始源,好掛住你哋!」然後不停用手俾心心,令全場又再陷入瘋狂。始源又話:「我有練習㗎,我都收到消息,自從疫情之後我哋係咪第一個海外歌手來香港演出嘅?非常非常感謝香港,好多謝大家等我哋咁耐,我哋會做更加好嘅演出俾大家睇!」
而隊長利特就指因為隔離關係,佢哋喺酒店休息足足兩日,「今日我哋嘅member體力非常之好,我哋喺酒店住咗兩晚咩都冇做,你知唔知呢兩日,香港嘅天氣如何我都唔知呀,聽講話熱我都唔覺得。」
而表演到中段時,成員就開始整蠱始源,問佢點解今次表演唔除衫?始源就笑道:「我今日完咗之後唔食飯!再想想....」成員就追問係咪第二場會派福利,佢就話:「我哋係咪合約簽明我要除架?」神童仲去揭起始源嘅上衣,即引全場哄動。